Qazaqstan Respýblıkasynyń Mádenıet jáne sport mınıstrligi men «Jolaýshylar tasymaly» AQ, sondaı-aq «Býrabaı Damý» JShS men «Kazakh Tourism» ulttyq kompanııasynyń Naýryz meıramyna oraı birlesip ázirlegen jobasy iske qosyldy.
Ol boıynsha kún saıyn Astana – Kýrort – Býrabaı merekelik elektr poıyzy qatynaıtyn bolady. Bul shara ishki týrızmdi damytý maqsatynda júzege asyrylyp otyr.
Naýryz meıramyna oraı ázirlengen etnıkalyq poıyz Astana – Býrabaı baǵyty boıynsha sáýir aıynyń sońyna deıin júredi. Poıyz Astananyń «Nurly jol» vokzalynan tańǵy saǵat 06.03 mınýtta jolǵa shyǵyp, «Astana-1» vokzalyna baryp aıaldaıdy, sóıtip saǵat 06.57 mınýtta ári qaraı jolǵa attanady, dep habarlaıdy Rail-news.kz.
Poıyz jol-jónekeı úsh stansaǵa ǵana toqtap ótedi. Olar – Aqkól, Eltaı jáne Makınka. Vagondar kondısıoner jáne bıoájethanamen jabdyqtalǵan. Bularmen birge jolaýshylar mazmuny oıyn-saýyqqa qurylǵan jáne paıdaly aqparaty bar vputi.kz mýltımedııalyq portalyn paıdalana alady.