Qorǵanys mınıstrligi Aqtaý gornızonyndaǵy áskerılerdiń tamaǵynan qurt shyqqany týraly málimetke túsinikteme berdi, dep habarlaıdy Egemen.kz.
«Aqtaý garnızonynda sapasyz tamaqtandyrýdy uıymdastyrýǵa qatysty 2023 jylǵy 2 naýryzda Qorǵanys mınıstrliginiń arnaıy komıssııasy tekseris júrgizgen bolatyn. Mańǵystaý oblysy ákiminiń keńesshisi, «Ana júregi» qoǵamdyq birlestiginiń múshesi Mahanbet Jaqsygúlmen, Aqtaý qalasynyń táýelsiz blogeri Ramazan Bıbigúlmen birlesip júrgizgen komıssııa jumysy kezinde azyq-túlikte qurt bar týraly aqparat rastalmady. Aqtaý garnızony prokýrorynyń qatysýymen merzimdi qyzmettegi áskerı qyzmetshilermen áńgimelesý kezinde jeke quram as ishetin ashanalarda jándikterdiń bolýyn biraýyzdan joqqa shyǵardy», delingen resmı málimette.
Mınıstrlik málimetinshe, áskerı qyzmetshiler arasynda ázirge eshkim ázirlengen taǵamǵa qatysty shaǵym túsirmegen.
«Maqalada aıtylǵan zańsyzdyqtar týraly málimetter shyndyqqa sáıkespeıdi. Qazirgi ýaqytta Qorǵanys mınıstrliginiń veterınarııalyq jáne sanıtarııalyq-epıdemıologııalyq qyzmetteriniń mamandary tamaqtanýdy uıymdastyrýdy baqylaý salasyndaǵy ýákiletti organdar bolyp tabylady. Olar ótken jyly 300-den astam tekserý júrgizip, tórt tamaqtanýdy uıymdastyrýshyǵa qatysty sotqa talap aryzdar bergen edi. Sot nátıjesinde jeńiske jetip, memleket kirisine 11 mln teńgeden astam somaǵa aıyppul sanksııalary óndirildi», dep jazylǵan mınıstrlik málimetinde.