Memleket basshysy Qasym-Jomart Toqaev VIII saılanǵan Parlament Májilisiniń birinshi sessııasynyń ashylýynda muǵalimder daıarlaý isin arttyrý úshin pármendi is-sharalar qabyldap, bilim berý júıesindegi menedjmentti jaqsartýǵa basymdyq berýdi tapsyrdy. Oqý-aǵartý mınıstrligi men Ǵylym jáne joǵary bilim mınıstrligi osy baǵytta keshendi jumys bastady.
Oblystyq bilim basqarmalary basshylarynyń, pedagogıkalyq joǵary oqý oryndary rektorlarynyń jáne vedomstvolyq baǵynysty uıymdardyń basshylarynyń qatysýymen eki mınıstrliktiń birlesken keńesi ótti. Is-sharaǵa qatysqan júzden astam maman pedagog kadrlardy sapaly daıarlaýdyń ózekti máselelerin, negizgi basymdyqtar men olardy sheshý joldaryn talqylady. Sondaı-aq birlesken yntymaqtastyq, jas muǵalimderdi daıarlaý jáne olardyń quzyrettiligin arttyrý máseleleri kóterildi.
Oqý-aǵartý mınıstriniń mindetin atqarýshy Ǵanı Beısembaevtyń aıtýynsha, kadr sapasy men pedagog mártebesin arttyrý boıynsha keshendi jumystar jalǵasyp jatyr. Keıingi tórt jylda muǵalimder jalaqysynyń eki ese ósýi – sonyń dáleli.
– Mınıstrliktiń basym mindetteriniń biri – bilim berý uıymdaryn joǵary bilikti kadrlarmen qamtamasyz etý jáne bilim berý júıesindegi menedjmentti jaqsartý. Myqty basshylardy irikteý jáne daıarlaý baǵdarlamasy ázirlenip jatyr. Tolyqqandy zertteı otyryp, joǵary bilikti pedagogter bazasyn jáne mektep dırektorlarynyń kadrlyq rezervin qurý jónindegi qaǵıdalardy ázirleý qajet. Memleket basshysynyń tapsyrmalaryn oryndaý maqsatynda qazir pedagogıkalyq joǵary oqý oryndarynyń Y.Altynsarın atyndaǵy Ulttyq bilim akademııasymen jáne bilim basqarmalarymen ózara is-qımylyn kúsheıtý óte mańyzdy, – deıdi Ǵanı Beısembaev.
Keńeste Ǵylym jáne joǵary bilim mınıstriniń mindetin atqarýshy Saıasat Nurbek sóz alyp, pedagogıkalyq bilim berýdi damytý boıynsha atqarylyp jatqan is-sharalar týraly aıtty.
– Memleket basshysy bilim berý salasyna ózgerister engizetin 1 myń kóshbasshy daıarlaýdy tapsyrdy. Osy tapsyrmany oryndaý úshin mınıstrlik jańa formasııadaǵy mektepterdiń top-menedjerlerin daıarlaýdy josparlap otyr. Ol úshin elimizdegi úzdik joǵary oqý oryndarynyń bazasynda jetekshi mektepterdi tarta otyryp, magıstratýranyń arnaıy baǵdarlamalary iske asyrylady. Pedagogıkalyq bilim berýdi akkredıtteý «Pedagog» kásibı standartyna negizdeledi. «Pedagog quzyrettiliginiń sheńberin» qabyldaý maqsatynda mınıstrlik «Joǵary oqý oryndarynyń oqytýshysy» kásibı standartynyń jobasyn ázirledi. Bul standart joǵary oqý oryndarynyń akademııalyq erkindigin eskere otyryp negizdemelik sıpatta júzege asady. Sondaı-aq «Jaıly mektep» jobasy aıasynda muǵalimderdi daıarlaý maqsatynda jyl saıyn pedagogıkalyq baǵyttarǵa 7 myń grant bólý josparlanyp otyr. Oqý-aǵartý mınıstrligimen birlesip, pedagogterge arnalǵan biliktilik testi ázirlenedi, – dedi Saıasat Nurbek.
Basqosý qorytyndysy boıynsha zamanaýı sapaly pedagogterdi daıarlaý máseleleri jóninde vedomstvoaralyq keńes qurý týraly sheshim qabyldandy. Keńes kadrlardyń sapasyn arttyrý jáne bilim berý uıymdaryn joǵary bilikti mamandarmen qamtamasyz etý jónindegi jumysty jalǵastyrady.