Qazaqstan Damý banki «KEGOC» AQ elektr jelilerin basqarý kompanııasyna oblıgasııalyq qaryz bóldi. Jalpy somasy 10 mlrd teńgeni quraıtyn qarajatty qaryz alýshy elimizdiń biryńǵaı energojúıesiniń batys aımaǵynyń joǵary voltty jelilerin rekonstrýksııalaýǵa jáne elektr jelisin nyǵaıtýǵa baǵyttamaq.
Joba tutynýshyǵa elektr energııasyn úzdiksiz jáne qaýipsiz jetkizý, qorshaǵan ortaǵa lastaǵysh zattar men tehnıkalyq shyǵaryndylardy azaıtý, sondaı-aq elektr energııasyn tutynýdy jylyna 4,392 mln kılovatt-saǵatqa qysqartý syndy mańyzdy áleýmettik áser beredi. Sonymen qatar qurylys kezeńinde jergilikti mamandar úshin 450-den astam jumys orny qurylady. Áýelik elektr jetkizý jelilerin rekonstrýksııalaý elektr jelileriniń turaqty jumys isteýin qamtamasyz etedi.
«Joba respýblıkamyzdyń batys óńirinde tutynýshylardy elektrmen jabdyqtaýdyń ótkizgishtigi men beriktigin arttyrýǵa múmkindik beredi. Sondaı-aq jeli shyǵyndaryn azaıtýǵa kómektesip, tutastaı energııa júıesiniń tıimdiligin arttyrady», deıdi «Qazaqstan Damý banki» AQ basqarma tóraǵasy Nurlan Baıbazarov.
Bul jumysty qarjylandyrý úshin bank jaqynda KASE bırjasynda debıýttik «jasyl» oblıgasııalardy ornalastyrýdan tartylǵan qarajatty paıdalanady. QDB KASE-de 30 naýryzda ótken saýda-sattyqta KEGOC-tyń «jasyl» oblıgasııalaryn satyp aldy. Osylaısha, oblıgasııalar men olardy ornalastyrýdan túsken qarajat jobany qarjylandyrýǵa tikeleı jumsalatyn boldy. Bul – oblıgasııalyq qaryz túrinde qurylymdalǵan QDB-nyń alǵashqy mámilesi.
«KEGOC» AQ «Qazaqstan qor bırjasy» AQ (KASE) saýda alańynda jylyna 19,51% óteýge ortasha alynǵan kiristilikpen jalpy kólemi 16,9 mlrd teńge bolatyn «jasyl» oblıgasııalaryn sátti ornalastyrdy. Baǵaly qaǵazdardy óteý merzimi 2037 jylǵa deıingi «KEGOC» AQ oblıgasııalarynyń ekinshi shyǵarylymy sheńberinde ornalastyryldy. Suranys pen usynystyń araqatynasy – 84,8%, bul ınvestorlardyń «KEGOC» AQ-nyń «jasyl» oblıgasııalaryna degen qyzyǵýshylyǵynyń artqanyn kórsetedi. «Jasyl» oblıgasııalardy shyǵarý sheńberinde elimizdiń Birtutas elektr energetıkalyq júıesiniń operatory Jasyl qarjy ortalyǵynan (AIFC Green Finance Centre) ICMA jasyl oblıgasııalar qaǵıdattaryna sáıkestik týraly syrtqy baǵasyn (Second Party Opinion) aldy.
QDB-den basqa, jobaǵa birlesken ınvestor retinde Eýropa qaıta qurý jáne damý banki qatysady. Bul birlesken joba otandyq ınfraqurylymdy damytýǵa sheteldik ınvestısııalardy tartý áleýetin kórsetedi. QDB kvazımemlekettik sektordyń jobalaryn basqa kredıtorlarmen birlesip, tek qana sındıkattalǵan nemese birlesken qarjylandyrý sharttarymen, jobalar ESG qaǵıdattaryna sáıkes kelgen jaǵdaıda qarjylandyrady.
«KEGOC» AQ Ulttyq elektr torabynyń (UET) aktıvterine ıelik etip, basqarady. Qyzmettiń negizgi túrleri tabıǵı monopolııalar salasyna jatady. Kompanııanyń balansynda UET-ty quraıtyn uzyndyǵy shamamen 27 000 km bolatyn, kerneýi 220-1150 kV elektr jetkizý jelileri jáne transformatorlarynyń belgilengen qýaty 38,99 GVA bolatyn 82 qosalqy elektr stansasy bar. Jýyrda kompanııa ótken jyldyń nátıjelerin talqylap, bıylǵa arnalǵan negizgi mindetterin belgiledi. Birtutas elektr energetıkalyq júıesiniń operatory óndiristik mejeni oryndaý, ınvestısııalyq jobalardy merziminde iske asyrý, qyzmetkerler úshin qaýipsiz eńbek jaǵdaılaryn jasaý, ál-aýqatty arttyrý baǵytyndaǵy belgilengen barlyq josparyn oıdaǵydaı iske asyrdy. KEGOC «Túrkistan qalasyn syrtqy elektrmen jabdyqtaý shemasyn kúsheıtý» jobasy sheńberinde kerneýi 220 kV «Ortalyq» qosalqy stansasynyń qurylysyn aıaqtady; Halyqaralyq qaıta qurý jáne Damý bankine 46,3 mln teńge kólemindegi qaryz merziminen buryn qaıtaryldy; Investısııalyq jobalardy iske asyrý úshin «jasyl» oblıgasııalar sátti ornalastyryldy. Energetıka mınıstrligi ókilderiniń, «Samuryq-Qazyna» AQ kompanııalar tobynyń HSE salasyndaǵy basshylary men sarapshylarynyń, sondaı-aq TMD elderi kompanııalarynyń qatysýymen eńbek qaýipsizdigi jáne eńbekti qorǵaý jónindegi birinshi forýmy ótkizildi. Kompanııa óz qyzmetkerleriniń densaýlyǵyn erikti medısınalyq saqtandyrý baǵdarlamasyn, sondaı-aq jeńildetilgen paıyzdyq mólsherleme boıynsha banktik qaryz berý arqyly joǵary bilikti kadrlardy tartý úshin jeńildetilgen nesıemen baspana satyp alý baǵdarlamasyn iske qosty.
Bıyl «Qazaqstan BEJ ońtústik aımaǵynyń elektr jelisin kúsheıtý» jáne «Batys Qazaqstannyń energojúıesin Qazaqstan BEJ-men biriktirý» jobalary boıynsha jumys jalǵasady. Sonymen qatar kompanııany qor naryǵyna (IPO) shyǵarýdy qamtamasyz etý, ESG-reıtıngin alý, sondaı-aq kompanııa qyzmetkerleriniń ál-aýqatyn arttyrý boıynsha josparlanǵan is-sharalardy júzege asyrmaq.
Kompanııanyń basqarma tóraǵasy Qanysh Moldabaevtyń aıtýynsha, atqarylǵan is-sharalar qyzmetkerlerdi yntalandyrýǵa, olardyń ál-aýqatyn arttyrýǵa, sondaı-aq kompanııadaǵy korporatıvtik mádenıet pen áleýmettik turaqtylyqtyń joǵary deńgeıin qoldaýǵa qosymsha serpin berdi. Úılesimdi jumystyń arqasynda «KEGOC» AQ aldaǵy ýaqytta kúrdeli tehnıkalyq jáne tehnologııalyq mindetterdi sheshýge daıyn ekendigin jetkizip otyr.