Taldyqorǵanda aýtızm jáne basqa da psıhıkalyq aýytqýy bar balalarǵa arnalǵan kúndizgi ortalyq ashylady. Tipti aldaǵy aptada jumysyn bastamaq nıette. Atalǵan nysan 125 orynǵa eseptelgen. Mamandar birinshi kezeńde 70 balany qabyldaýdy josparlap otyr. Osy oraıda óńir basshysy Beıbit Isabaev ortalyqqa arnaıy baryp, jumys barysymen tanysty.
Ǵımarattyń ishi-syrty talapqa saı jabdyqtalǵan. Negizinde ǵımarat jergilikti bıýdjet esebinen satyp alynyp, oǵan jalpy somasy 200 mln teńgege kúrdeli jóndeý júrgizilgen. Qajetti jabdyqtardy «Qamqorlyq» korporatıvtik qory satyp áperipti. Dırektory Marat Bakıevtiń aıtýynsha, yńǵaıly bolý úshin ońaltý ortalyǵyndaǵy eki aýysymda – túske deıin jáne tústen keıin 4,5 saǵattan áleýmettik qyzmetter kórsetiledi.
О́ńir ákiminiń baspasóz qyzmetiniń málimetinshe, ortalyqta sensorlyq, mýzykalyq, prosedýralyq kabınetter, emdik deneshynyqtyrý, fızıoterapııa, massaj, robottehnıka, eńbekke baýlý, jeke jáne toptyq jumys kabınetteri, sondaı-aq logoped, psıholog, defektolog kabınetteri, qysh sheberhanasy bar. Basty mindeti – týyndaǵan áleýmettik problemalardy eńserýge jáne qoǵam ómirine aralasýdyń teń múmkindikterine jaǵdaı jasaýǵa baǵyttalǵan qyzmetter keshenin usyný. Bul oblystaǵy osyndaı alǵashqy ortalyq bolmaq.
Durys qoǵam eshkimdi alalamaıdy. Qazaq obal, saýap degen túsinikke erekshe kóńil bólgen. Endeshe ózimizdiń aıyrylmas bir bólshegimiz, ártúrli jaǵdaıǵa baılanysty qımyl-qozǵalysy shektelip qalǵan baýyrlarymyzǵa járdem berý, qoldaý – azamattyq paryzymyz. Keıingi ýaqytta ekologııalyq jaǵdaıǵa baılanysty ma, ishken astan ba, qoldanǵan dári-dármekten be, eshkim sebebin tap basyp aıta almaıtyn keselder kóbeıdi. Sonyń biri – balalar arasynda psıhıkalyq buzylystary bar, aýtıst dertine shaldyqqandar sanynyń kóbeıgeni. Erekshe balalarǵa óz deńgeıinde qamqorlyq kerek.
Máselen, «Qamqorlyq» arnaýly áleýmettik qyzmet kórsetý ortalyǵy» kommýnaldyq memlekettik mekemesi múmkindigi shekteýli balalarǵa áleýmettik-medısınalyq qyzmet kórsetedi. Psıhıkalyq buzylyspen dúnıege kelgen balalardyń tolyqqandy ómir súrýine barlyq jaǵdaı jasalǵan. Jatyn oryn, oıyn alańy talapqa saı jabdyqtalǵan. Ishim-jemnen tarshylyq joq. Meıirim úıinde jylyjaı bar. Onda gúldiń san alýan túri ósiriledi. Qystyń kúni balalar erkindikti qalap, ózimen-ózi bolǵysy keletin kezderi bolady eken. Sonda osy jylyjaıǵa kelip, topyraqpen oınap, gúlderge súısinip, ósimdikterdi sýaryp, tabıǵatty tamashalap, kóńil kúıi kóteriletin kórinedi.
«Búgingi jahandyq aqparattyq ózgerister jaǵdaıynda qazirgi ata-analardyń bala tárbıesine qaraýyna ýaqyty jetpeıdi. Sondyqtan balalarymyzdy smartfon, vırtýaldy álem tárbıelep jatyr. Osy oraıda ata-ájelerdiń urpaq tárbıesindegi róli erekshe. Sizderdiń tárbıelerińiz arqyly balalar janashyrlyqqa, túsinistikke, ózara bir-birin qoldaýǵa úırenedi. Sondyqtan óskeleń urpaqty, qazirgi jastardy tárbıeleýde sizderdiń kómekterińiz asa qajet», dedi B.Isabaev.
«Teń qoǵam» dep atalatyn ortalyq múgedektigi bar adamdarǵa jan-jaqty kómek kórsetýge arnalǵan. Olardyń qujattaryn resimdep, ınternet arqyly kerek-jaraǵyn suratýyna járdem beriledi. Ortalyqta Sanjar Jaqsylyqovtyń shash qııý, tyrnaq boıaý ámbebap ortalyǵy tanystyryldy. Jas kásipkerler «Jas project» jobasy aıasynda bıznesin qalaı júrgizip jatqanyn aıtyp berdi. Mysaly, Sanjar 1 mln teńge somasyna grant alyp, polıtehnıkalyq kolledj bazasynda shashtaraz, manıkıýrlik kosmetologııalyq qyzmetter kórsetiletin shaǵyn sulýlyq salonyn ashqan. Bastapqyda Sanjar men janyndaǵy taǵy 2 jas sheber kórsetken qyzmetteri úshin aqy almaǵan, osylaısha biraz tájirıbe jınaqtap baryp, keıin tabys taba bastaǵan. Al Nazerke bolsa, grant qarajaty esebinen óziniń aspazdyq isin qolǵa alypty.
Shynynda, rýhanı jáne materıaldyq kómekti sezingen adamnyń shattanǵan sátin kórýdiń ózi – bir baqyt. «Jiger» múgedekterdiń qoǵamdyq birlestigi, «Alpamys» QB, Taldyqorǵan sańyraýlar qoǵamynyń Oqý-bilim berý kásiporny jáne birqatar jeke kásipker de óz ónimderin, atap aıtqanda, ózderi tikken bylǵary aıaqkıim, tósek-oryn, arnaıy kıim, salǵan sýretterin, túrli dekor men turmystyq zattaryn kórsetti. О́nimderdiń kópshiligi áleýmettik jeliler arqyly satylady. Degenmen zamanaýı tigin mashınasyn satyp alýǵa qoldaý qajet, aıaqkıim jasaý sehy men saýda bazaryndaǵy oryn úshin tegin bólme bólý, seh úı-jaıyn jóndeý, medısınalyq kómek kórsetýde de problemalar bar. Bul rette oblys ákimi barlyq aıtylǵan másele boıynsha, eń aldymen saýyqtyrý máselelerinde tıisti qoldaý kórsetiletinin aıtty.
Áleýmettik qyzmet kórsetý nysandaryn aralaǵan soń Beıbit Isabaev kásipker Erdos Baıalyshbaev ashqan «Asar» jańa sporttyq-ońaltý kesheninde boldy. Zaman talaptaryn eskere otyryp salynǵan ortalyqta tirek-qımyl apparatynda buzylysy bar adamdardy ońaltýǵa barlyq qajetti jaǵdaı jasalǵan. Dáriger, logoped, psıholog kabıneti, úlken trenajer zaly, kınezoterapııa jáne LFK zaly, massaj, emdeý kabınetteri, fızıoterapııa júrgizýge arnalǵan kabınet, býfet, yńǵaıly dárethana bólmeleri qarastyrylǵan.
Ortalyqtyń dırektory Eldos Baıalyshbaevtyń sózine súıensek, ortalyqty resmı túrde maýsym aıynyń basynda ashý josparlanyp otyr, al qazirgi tehnıkalyq ashylýy barysynda jabdyqtar tekserilip, irgeles aýmaqty abattandyrý jumystary júrgizilýde.
«Bizdiń ortalyqtyń qurylyp bastaǵanyna 4 jylǵa jýyq ýaqyt boldy. 2015 jyly ortalyq ashý týraly oı kelip, ony kezeń-kezeńimen sala bastadyq. Túrli memlekettik baǵdarlamalarǵa qatysyp, sonyń arqasynda granttar utyp, óz bıznesimdi damytyp, jeńildikti sharttarmen nesıe aldyq. Japonııa elshiliginiń qoldaýymen eki ret grant jeńip aldym. Sol arqyly Italııadan, Polshadan zamanaýı jabdyqtar satyp aldyq. Endi bizge ońaı basqarylatyn, kópfýnksııaly ekzoskeletter Ispanııadan ákelinetin boldy. Sonymen qatar fızıoapparattar, magnıtoterapııa, elektrostımýlıasııa, ońaltýǵa arnalǵan aspaly júıeler jáne taǵy basqa da jabdyqtar kelýshilerdi ońaltýǵa septigin tıgizedi. Memlekettik áleýmettik tapsyrystyń nátıjesinde ortalyqtaǵy barlyq qyzmet tegin kórsetiledi», dedi Eldos.
Onyń aıtýynsha, ortalyq 400 adamǵa arnalǵan, onda 27 maman jumys isteıdi. Bul rette «Qaratal» shaǵyn aýdanynda ornalasqan «Asar» birinshi ortalyǵy balalardy ońaltý ortalyǵy retinde qaıta jabdyqtalmaq, osyǵan baılanysty onda tıisti jóndeý jumystaryn júrgizý josparlanǵan.
Qasıetti Ramazan aıyndaǵy múmkindigi shekteýli jandarmen kezdesý erekshe ótti. Dál osy kúni qaladaǵy júrip-turýy qıyn adamdardy tasymaldaýǵa jańadan 3 ınvataksı berildi. Zamanaýı úlgidegi taksı paıdalanýshylardyń kóńilinen shyqty. Jyly júzdesý kóp jannyń úmitin ushtady.
Jetisý oblysy