Ǵylymǵa yjdaǵattylyq kerek degendi jıi aıtamyz. Al sol tájirıbeni basynan ótkizgen ǵalymnyń biri marqum Sulýken Rahmadıeva edi. Ol otandyq farmasevtıkany damytýǵa zor eńbek sińirgen edi. Bir ózi 45 túrli dári jasap shyqty.
Súttigen ósimdiginiń 15 túrin tabany kúrekteı 15 jyl zerttep, sonyń báriniń de bıologııalyq belsendiligin anyqtady. Onyń atyn shyǵarǵan iri jetistiginiń biri – qaterli isikke qarsy qoldanylatyn «Súttigen» dárisi.
Sulýken Bıǵalıqyzy tuńǵysh ret otandyq ónertapqyshtardy yntalandyrý úshin jarııalanǵan «Qazaqstannyń eńbek sińirgen ónertapqyshy» baıqaýynyń jeńimpazy bolǵan. Ol kezinde qazirgi L.N.Gýmılev atyndaǵy Eýrazııa ulttyq ýnıversıteti Bıoorganıkalyq hımııa ǵylymı-zertteý ınstıtýtynyń dırektory bolyp jemisti eńbek etti. Ony osy bıikke kótergen jurt nazaryndaǵy jetistikteri men kóz maıyn taýysyp jazǵan 250-den astam ǵylymı eńbegi edi.
Hımııa ǵylymdarynyń doktory, professor S.Rahmadıeva tabıǵı jáne fızıologııalyq belsendi zattar hımııasy, bıoorganıkalyq hımııa, farmasevtıkalyq óndiristiń tehnologııasy men uıymdastyrý salasynda tabandy eńbegimen kózge tústi. Eldegi ósimdikterdiń ishinen bıologııalyq belsendi qosylystardyń jańa kózderin izdep, olardyń negizinde medısına men aýyl sharýashylyǵyna arnalǵan preparattar ázirledi. Sol arqyly jańa qor saqtaǵysh tehnologııalaryn ázirleý ári engizý, jańa zattar men ósimdik tekti dárilerdiń bıoskrınıngin júrgizip, óndiriske engizý maqsatynda jańa otandyq fıtopreparattar men olardyń dárilik formalaryn daıyndady.
Sulýken Bıǵalıqyzyn jurtshylyq elimizdegi tuńǵysh ónertapqysh áıel retinde jaqsy biledi. Onyń ár zertteý baǵyty otandyq ǵylymnyń kókjıegin keńeıtý, ult ǵylymyna úles qosý deıtin ózgeshe maqsattarmen ushtasyp jatatyny shyndyq edi. Ǵalym bir suhbatynda «Qazaqstanda ǵylymdy damytý isi onyń ımportqa, ózge elder tehnologııasyna táýeldiligin azaıtýǵa yqpal etý kerek. Sol sebepti elimizdiń ishki óndiris qýattaryn, shıkizat resýrstaryn jáne ǵylymı-tehnıkalyq áleýetti tıimdi paıdalana bilgenimiz jón», degen eken. Bul pikirdi onyń ǵylymǵa degen adal kózqarasy dep uqqan durys.
Otyzdan astam patenttiń avtory atanǵan Sulýken Bıǵalıqyzy jańa ónimderdi halyqaralyq deńgeıde patentteýge jyl saıyn kóp qarjy jumsalatynyn ashyq aıta júrip, otandyq dári óndirisiniń olqy tusyn bútindeýge tyrysty. «Bir ǵana «Súttigendi» jasap, engizý úshin 15 jyl ýaqytymdy sarp ettim» deýi shynymen de úlken jankeshtilik.
Qazaq ǵylymynyń kókjıegin keńeıtý úshin ózińde bar ynta men jigerdi, múmkindikti paıdalanyp, jas urpaqqa ǵylym jolynda aıanbaı eńbek etýge úlgi kórsetken Sulýken Bıǵalıqyzynyń eńbegi eshqashan óshpek emes.