Aqtaýda aýyzasharǵa barǵan 16 medısına qyzmetkeri astan ýlanyp qaldy, dep habarlaıdy Egemen.kz.
Buǵan deıin áleýmettik jelide Aqtaýda adamdardyń jappaı ýlanǵany týraly aqparat taraǵan edi. Avtorlardyń aıtýynsha, 50-den astam adam ýlanǵan, olardyń kópshiligi dárigerler.
Aqtaý ákimdiginiń baspasóz qyzmeti aqparatty rastady. Baspasóz qyzmetiniń málimetinshe, 10 sáýirde qaladaǵy meıramhanalardyń birinde aýyzashar ótip, oǵan aýdandar men qaladaǵy emdeý mekemeleriniń dárigerleri shaqyrylǵan. Merekelik sharaǵa barlyǵy 50 adam qatysqan. Ýlaný belgilerimen 16 adam kómek suraǵan. Alty adam Mańǵystaý oblystyq kópsalaly aýrýhanasyna emdelýge jiberilgen. «Naýqastarda joǵary qyzý, qusý, ish ótý, jedel ishek ınfeksııasyna tán ıntoksıkasııa sındromy anyqtalǵan. Barlyq qajetti sharalar qoldanylyp, em júrgizilip jatyr. Eshqandaı qaýip joq, naýqastardyń jaǵdaıy turaqty, temperatýrasy birqalypty, dınamıkasy oń. Qazir naýqastar qajetti em qabyldap jatyr. Shaǵymmen kelgen kezde qan qysymdary tómen bolǵan, ınfýzıondy terapııadan keıin jaǵdaılary jaqsardy», deıdi oblystyq kópbeıindi aýrýhanasynyń juqpaly aýrýlar bóliminiń meńgerýshisi Gúlbaný Nurjanova.