Úkimet Qazaqstanda ǵylymnyń ashyq modelin qalyptastyrý úshin keshendi sharalardy júzege asyrýy kerek. Osy oraıda Memleket basshysy Qasym-Jomart Toqaev Premer-mınıstr Álıhan Smaıylovqa birqatar mindet júktedi, dep jazady Egemen.kz.
«Úkimet Qazaqstanda ǵylymnyń ashyq modelin qalyptastyrý úshin keshendi sharalardy júzege asyrýy kerek. Eń aldymen, ǵylymdy damytýdyń jańa tásilderin zań júzinde bekitip, memlekettiń ǵylymı-tehnologııalyq jáne ekonomıkalyq saıasatynyń ózara baılanysyn kúsheıtken jón», dedi Prezıdent.
Prezıdent taıaýda ǵana Ǵylym men joǵary bilim salasyn damytýdyń 2029 jylǵa deıingi tujyrymdamasy qabyldanǵanyn eske saldy.
«Endi ǵylym men tehnologııalyq saıasat týraly arnaıy zań ázirleýdiń qajettiligi týyndady. Bıznesti ǵylymǵa qarjy quıýǵa yntalandyrý úshin salyq jeńildikteri men ınvestısııalyq preferensııalardy «aýqymdy shegerimder» túrinde engizý qajet.
Álıhan Ashanuly, ǵylymǵa kóbirek ınvestısııa tartý úshin salyq júktemesin jeńildetý arqyly yntalandyrý múmkindikterin qarastyryńyz. Bizge salyq saıasatynda, jalpy alǵanda, ıkemdi tásilge kóshý kerek dep oılaımyn. Azaıtýǵa múmkindik bar jerde, qoryqpaý kerek. Túptep kelgende, Salyq kodeksi osy zańnama aıasynda tıisti sheshimder qabyldaýǵa múmkindik beretin qarapaıym normatıvtik akt bolýǵa tıis. Búkil Salyq kodeksin myń betten turatyn qasıetti kitapqa aınaldyrmaıyq. Osyǵan keliseıik», dedi Memleket basshysy.
Prezıdenttiń aıtýynsha, bul jeńildikter ǴZTKJ men ǵylymı ortalyqtardyń damýyn qarjylandyratyn kásipkerlerge berilýge tıis. Mundaı tájirıbe Sıngapýrda, Qytaıda, Ońtústik Koreıada óz tıimdiligin kórsetti. Salyq, Kásipkerlik jáne Bıýdjet kodeksterine naqty normalardy bıyldan qaldyrmaı engizý kerek.