Qazaqstan Qarýly Kúshteriniń dástúri boıynsha, Saryózek garnızonynyń shabýyldaý brıgadasynda belgilengen qyzmetin abyroımen ótegen 200-den asa sarbazdy shyǵaryp salý rásimi ótti, dep habarlaıdy Egemen.kz.
Osydan bir jyl buryn 2022 jyldyń kóktemgi aılarynda ásker qataryna elimizdiń ár óńirinen shaqyrylǵan sarbazdar, endi mine, Otan aldyndaǵy boryshyn abyroımen atqaryp shyqty.
Olar bir jyl boıy áskerı mamandyqty meńgerip, jaýyngerlik daıarlyqta eleýli nátıjelerge qol jetkizdi, sondaı-aq minezderin shyńdap, áskerı tártipti úırenip, komandada jumys isteýdi iske asyrdy.
Zapasqa shyǵarylǵan sarbazdarǵa qurmet kórsetý sharasy áskerı bólimniń saptyq alańynda uıymdastyrylyp, oǵan brıgadanyń áskerı qyzmetshileri men Qarýly Kúshterdiń ardagerleri qatysty.
Saltanatty jıynda brıgada komandıri podpolkovnık Daýlet Sekenov jeke quramdy mańyzdy is-sharamen quttyqtap, sóz sóıledi. Onyń aıtýynsha, zapasqa shyǵarylǵan sarbazdar bir jyl ishinde egemendi memleketimizdiń tynyshtyǵy men qorǵanysyn qamtamasyz etip, tutastyǵyn saqtaýǵa óz úlesterin qosqanyna alǵysyn bildirdi.
Sonymen qatar, jaýyngerlik daıarlyǵyndaǵy joǵary kórsetkishteri úshin eń úzdik sarbazdar gramotalarmen jáne alǵys hattarmen marapattaldy. Sondaı-aq bólim komandıriniń atynan zapasqa shyǵarylǵan birqatar áskerı qyzmetshilerdiń ata-analaryna alǵys hattar jiberildi.
Odan keıin sarbazdar saptyq adymmen ortaǵa shyǵarylyp, bólimniń jaýyngerlik týymen qoshtasty. Olarǵa bir jyldyń kólemindegi áskerı is-sharalar men oqý-jattyǵýlarynan estelik retinde fotoalbomdar taratyldy. Birqatar úzdik sarbazdarǵa arnaıy daıyndalǵan tý astyndaǵy fotosýretter saltanatty túrde tabys etildi.
«Mine búgin bizdiń bir jyldyq áskerı qyzmetimizde aıaqtaldy. Biz Otan aldyndaǵy boryshymyzdy abyroımen atqardyq dep oılaımyn. Bizdi joǵary jaýyngerlik daıarlyq pen áskerı tártipke úıretip, árqashan qoldaý kórsetken ofıserler men serjanttarǵa aıtar alǵysym mol. Bolashaq jastarǵa aıtarym Otan aldyndaǵy mindetterin ótep, aıbyndy áskerimizde qyzmet etýge shaqyramyn», dedi áskerı boryshyn aıaqtaǵan sarbaz efreıtor Jandos Almasov.
Saltanatty qoshtasý rásimi bólimniń jeke quramynyń saltanatty sherýimen aıaqtaldy.