Halyqaralyq «Bolashaq» baǵdarlamasynyń túlegi, PhD, bıolog-genetık Baýyrjan Aıtýov tis emalin qalpyna keltiretin «InnoDent» tehnologııasyn oılap tapty. Tyń tehnologııa tiske túse bastaǵan daq túrindegi karıesti emdeýge múmkindik beredi.
Baýyrjan áriptesterimen birge buzylǵan emaldi qalpyna keltirý úshin amın qyshqyldarynan amelogenın aqýyzyn jasandy túrde sıntezdegen. Ǵalymnyń aıtýynsha, ony karıestiń alǵashqy satysynda tiske tamyzsa, bir aı ishinde tis emali qalpyna keledi. Osylaısha, dári tis jegisin burǵylaýsyz, operasııasyz emdeýge múmkindik beredi.
О́nertapqyshtyń tehnologııasy patenttelgen. Qazirgi tańda bul preparatty tek elde ǵana emes, shetelde de qoldanady. Elimizde Almaty men Astananyń tis emhanalary paıdalanyp júr.
Baýyrjan Aıtýov «Bolashaq» baǵdarlamasymen Iork ýnıversıtetinde genetıka salasyndaǵy bakalavr dárejesin alǵan. Elge oralǵannan keıin oqýyn Eýrazııa ulttyq ýnıversıtetinde jalǵastyryp, onda magıstr jáne keıinnen doktor dárejesin ıelendi. 2011-2014 jyldary Nazarbayev University-de qyzmet atqarǵan.
Búginde jas ǵalym ártúrli bıotehnologııalyq jańalyqtardy ashýmen aınalasyp jatyr. Sondaı-aq Baýyrjan – «InnoDent» jáne «Center for BioEnergy Research» kompanııalarynyń negizin qalaýshy.