Gúlsimniń «Ushqyr qalamy»

Is-sharaǵa elimizdiń belgili qalam­ger­leri, qoǵam qaıratkerleri, sheteldik qonaqtar, buqaralyq kommýnı­kasııa zertteýshileri, jýrnalıstıka fa­kýl­tetiniń oqytýshy-professorlary, BAQ mamandary, stýdentter, magıs­tranttar men doktoranttar qatysty.

Jýrnalıstıka fakýltetiniń dekany Nurjan Qýantaıuly júrgizgen kezdesý stýdent­ter úshin de mazmundy boldy. Tanystyrylymda «Ush­qyr qa­lam­» kitabynyń jýrnalıs­terge ádistemelik jáne motıvasııalyq oqý quraly retinde de baǵaly ekeni aıtyldy.

Sebebi áriptesimizdiń pýblı­sıstıkasynda memleketshildik minez, ulttyq qundylyq, tarıhı tanym-tú­sinik keńinen kórinis beredi. Sana­ńa salmaq sala otyryp oıyńdy sergitedi. Ta­qy­rybyn taldap, saraptap búgingi oqyr­man talabyna jaýap beredi. «Egemen Qazaqstan» gazetinde «Túrme. Áıel. Taǵdyr», «Shý boıyn shýlatqan shóp», «HH ǵasyr indeti», «Ananyń ajaly» degen maqalalar sıklin jarııa­lap, atalǵan indettiń jaılap bara jatqanyn aıtyp, oqyrmanǵa oı saldy.

Bas gazettiń Parlamenttegi alǵash­qy tilshisi bola júrip, «Amerıka ashsa qushaǵyn», «Vengrııamen baılanys», «Bakýde bolǵan eki kún», «Iran ıi­rim­deri», «Shyńjańda shyrqalǵan án», «Hafız ben Saǵdı elinde», «Home­neı­diń senimdi serigi», «Afrıkanyń ala­sapyrany» sııaqty halyqaralyq taqy­ryptaǵy maqalalary táýelsizdiktiń alǵashqy jyldaryndaǵy syrtqy saıa­satttyń tynysyn tańbalady. Qazir ol Syrtqy ister mınıstrliginde jaýapty qyzmette. Kóptegen ǵylymı-pýblısıstıkalyq, eki monografııalyq kitaptyń avtory, ekinshi synypty ke­ńesshi dıplomatııalyq dárejesi bar.

Tanystyrylym barysynda qoǵam qaıratkeri Sát Toqpaqbaev, jazýshy Sáýle Dosjan, ataqty ánshi Sáýle Jan­peıisova, dıplomatııa ar­dageri Rafııa Derbisálıeva, Syrt­qy ister mınıstri­niń ókili, dıplomat Al­masha Arenova, belgili aqyn Qýat Qaı­ran­baev, ǵalym Shárıpa Nurjanova jańa kitap týraly jyly lebizderin bildirdi. Sáýle Janpeıisova ánimen shashý shashsa, A.Arenova Syrtqy ister mınıstrliginiń quttyqtaý hatyn tapsyrsa, jýrnalıs­tıka fakýltetiniń dekany Nurjan Qýantaıuly Alǵyshat berdi.

Al Alataýdyń arǵy jaǵynan arnaıy kelgen Qyrǵyz Prezıdenti ja­nyndaǵy Aqsaqaldar keńesiniń tór­­aǵasy Dáýletbek Shádibekov eki el ara­syndaǵy mádenı baılanysqa qosqan úlesi úshin Gúlsim Eńsepovaǵa Shyń­ǵys Aıtmatov atyndaǵy marapatty tapsyrdy.

ALMATY