Qazaqstan qurama komandasy matematıkadan halyqaralyq 40-shy Balqan olımpıadasyna qatysyp jatyr, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
Bıyl matematıkadan halyqaralyq Balqan olımpıadasy Túrkııanyń Antalııa qalasynda ótýde. 40-shy olımpıadaǵa Balqan túbeginiń 22 elinen jáne qonaq memleketterden 130-dan astam qatysýshy qatysyp jatyr. Olardyń qatarynda Qazaqstan qurama komandasy da bar.
«Olımpıada - matematıka páninen daryndy oqýshylardy yntalandyrý jáne olardy shyńdaýdy kózdeıdi. Sondaı-aq qatysýshy elderdiń óz arasynda mektep baǵdarlamalary men tájirıbeleri týraly aqparat almasýǵa múmkindik jasalǵan. Qazaqstan bul olımpıadaǵa jyl saıyn qonaq retinde qatysyp, júldeli oryndar ıelenip júr», deıdi «Daryn» RǴPO dırektory Ǵajdembek Tursynov.
Qazaqstan atynan qatysqan qurama komandada 6 oqýshy bar. Olar oqý-jattyǵý jıynynyń qorytyndysy boıynsha eń joǵary upaı jınaǵan úzdikter.
Aıta keteıik, 40-shy Balqan matematıkalyq olımpıadasynyń qorytyndysy 13 mamyrda belgili bolady.