Jýrnalıst Ǵalym Qojabekov Sanjar Táshkenbaıǵa qatysty jazba jarııalady, dep habarlaıdy Egemen.kz.
Belgili sport jýrnalısi Tashkentte el namysyn qorǵap, álem chempıony atanǵan Sanjar Táshkenbaımen saparlas bolǵany týraly aıtty.
«Tashkent-Astana baǵytynda ushqan ushaqqa minip, ornyma jaıǵasqanym sol edi, janyma kelip Sanjar Táshkenbaı jaıǵasty. Sodan Astanaǵa jetkenshe biraz áńgimelestik.
Astanadaǵy Jambyl Jabaev atyndaǵy №4 mektep-gımnazııada oqyǵan Sanjar 17 jasynda bokstan Azııa jáne álem chempıony bolǵan. 18 jasynda eresekter arasyndaǵy Azııa chempıony atandy. Áńgime barysynda bir áttegen-aıy bar ekenin de aıtyp qaldy. Men bir sózimde qaıda oqısyń dep qaldym. Ol bolsa «Eshqaıda oqymaımyn, 2021 jyly L.Gýmılev atyndaǵy Eýrazııa ulttyq ýnıversıtetine oqytýshy-jattyqtyrýshy mamandyǵyna grantqa oqýǵa túsken edim. Biraq oqýym uzaqqa barmady, birinshi kýrstyń ortasynan bastap stıpendııamnan aıyryldym. Odan keıin sabaqqa belsendi qatyspaǵanym jáne jazǵy praktıkaǵa qatyspaǵanym úshin oqýdan shyǵyp qaldym. Aqyly oqýǵa aýysaıyn desem qarajat jetispeıdi, úıde menen basqa bes bala bar, ákem qarapaıym taksıst, anam úı sharýasynan bosamaıdy. Bul kezderi men jastar arasyndaǵy Azııa jáne álem chempıonatyna qyzý daıyndyq júrgizip júrgenmin. Tynymsyz jattyǵýlarymnyń arqasynda eki jarysta da chempıon boldym. Al 2022 jyly eresekter arasyndaǵy chempıonatta chempıon atandym. Biraq oqýymnan shyǵyp qaldym, soǵan ókinemin, aǵa» dep kóńilinde júrgen bir kirbińin bildirdi», delingen jýrnalıst jazbasynda. Aıta keteıik, Sanjar Táshkenbaı 2021 jyly Polshada ótken bokstan jastar arasyndaǵy álem chempıonatynda birinshi oryn ıelengende Astana ákimdigi oǵan oqý grantyn taǵaıyndaǵan bolatyn.