Álem chempıonaty Astanada ótedi

2016 jyly Astanada álem chempıonaty uıymdastyrylǵan edi. Sol jarysta Qazaqstan quramasy tabys­ty óner kórsetip, 4 altyn men 2 qola medal oljalaǵan-tyn. Atap aıtsaq, Nazym Qyzaıbaı, Dına Jolaman, Valentına Halzova jáne Lázzat Kúngeıbaeva teńdessiz dep tanylsa, Jaına Shekerbekova men Aıjan Qojabekova úshinshi satyǵa taban tiredi. Dál osy kórsetkishtiń arqasynda jerlesterimiz jalpykomandalyq esepte kósh bastady. Atalǵan jarysta bizden bólek, taǵy bes mem­leket­tiń ánurany shyrqalyp, 19 eldiń týy kókte jelbiredi. Sol kezde AIBA basshylyǵy chempıonattyń uıymdastyrylý deńgeıine óte joǵary baǵa berip, meımandar qazaqtyń qonaqjaılyǵyna tánti bolyp qaıtty.

– Qazaqstan sekildi asa kúshti boks derjavasy áıelder arasyndaǵy álem chempıonatyn qaıta qabyldaǵaly jatyr. Biz oǵan rızamyz. Osydan jeti jyl buryn tórtkúl dúnıeniń teń­dessiz bylǵary qolǵap sheberleri As­tanada jınalǵan edi. Ol kezde jarys óte joǵary deńgeıde uıym­dastyryldy. Kelesi jyly da biz burymdylar arasyndaǵy keremet sporttyq is-sharanyń kýási bola­tynymyzǵa kúmánimiz joq, – deıdi IBA prezıdenti Ýmar Kremlev.

Qazirdiń ózinde Astanadaǵy ja­rys­­tyń júlde qory belgili. Ol 4,8 mıllıon AQSh dollaryn qurap otyr. Soǵan saı bas júldeni ol­ja­la­ǵan boksshyǵa 200 myń dollar berilse, kúmis medal ıelengender sol somanyń teń jartysyn alady. Al qola júldeni enshilegenderge 50 myń dollar tıesili.

Eń keıingi álem chempıonaty bıyl­ǵy naý­ryz aıynda Úndistannyń Nıý-Delı qala­synda ótti. Bul jarysta 64 mem­leketten kelgen 324 burymdy baq synady. 2 kúmis pen 4 qola ıelen­gen Qa­zaqstan quramasy jalpy esepte se­gizinshi satyǵa jaıǵasty. Ol kezde Karına Ibragımova (57 kılo) men Lázzat Kúngeıbaeva (+81 kılo) fınalǵa deıin jetse, Alýa Bal­qy­bekova (48 kılo), Nadejda Rıabes (66 kılo), Valentına Halzova (75 kılo) jáne Farıza Sholtaı (81 kılo) qola medaldi moıyndaryna ildi. Komandalyq saıysta Úndistan qura­ma­sy (4+0+0) úzdik shyqty. Ekinshi jáne úshinshi oryndardy Qytaı (3+1+3) men Reseı (1+1+1) oljalady.