Almaty qalasynda TMD elderinde tuńǵysh júzege asyrylatyn jelilik kampýs jobasynyń tanystyrylymy ótti, dep jazady Egemen.kz.
Bul – Dýlatı ýnıversıteti, «Qazfosfat» JShS jáne D.I.Mendeleev atyndaǵy Reseı hımııa-tehnologııalyq ýnıversıtetiniń birlesken jobasy. Hımııa ónerkásibi úshin bilikti kadrlardy daıarlaýdy kózdeıtin jelilik kampýs «Qos dıplomdy» bilim berý baǵdarlamasy aıasynda júzege asyrylady.
Erekshe formatta ótken jıynda M.H.Dýlatı atyndaǵy Taraz óńirlik ýnıversıtetiniń rektory Muhtar Baıjumanov jelilik kampýstyń basty basymdyqtaryn túsindirip ótti.
«Bul joba jastarǵa qandaı múmkindikter beredi? Talapker eki jyl Dýlatı ýnıversıtetinde hımııa jáne hımııa óndirisi salasyndaǵy bilikti professor-oqytýshylardan dáris alady. 3-kýrsta Mendeleev ýnıversıtetinde oqýyn jalǵastyryp, bilimin shyńdaıdy. Sońǵy 4-shi jyly Qazfosfat zavodynyń bazasynda oqý men tájirıbeni ushtastyryp daıyndyqtan ótedi. Osyndaı úshjaqty daıyndyqtan ótken mamandar úshin jumys oryndary daıyn», dedi Muhtar Qazbekuly.
2023 jyly jelilik kampýs aıasynda «Beıorganıkalyq zattar tehnologııasy» atty alǵashqy qos dıplomdy bilim berý baǵdarlamasy iske qosylady, negizgi baǵyty — tyńaıtqyshtar óndirý. 2023 jyldyń jazynda baǵdarlamaǵa alǵashqy qabyldaý ótedi, sonymen qatar Qazaqstannyń basqa ýnıversıtetterinen baǵdarlamanyń birinshi kýrsyna da, ekinshi jáne úshinshi kýrsyna da túsýge bolady: birinshi kýrs stýdentteri úshin 175 oryn, ekinshi jáne úshinshi kýrstarǵa 150 oryn qarastyrylǵan. Túlekter M.H. Dýlatı atyndaǵy Taraz óńirlik ýnıversıteti men Mendeleev ýnıversıtetiniń qos dıplomyn alyp shyǵady.
«Hımııa ónerkásibi salasynda jelilik bilim berý kampýsyn iske qosý – eńbek naryǵynyń suranysyna jaýap beretin mańyzdy qadam. Bul TMD elderiniń bilim berý keńistigin damytýǵa múmkindik beredi. Baǵdarlama boıynsha bilim alatyn stýdentter avtomattandyrylǵan, zamanaýı jabdyqtarmen tabysty jumys isteýdi úırenedi. Biz jastardy jańa óndiristik jelilerdi jobalaýǵa múmkindik beretin bilim men pánaralyq quzyretilikterge baǵyttalǵan júıemen oqytamyz. RHTÝ – salaǵa baǵyttalǵan jáne onyń kadrlyq qajettilikterdi úılestirip otyratyn ǵylym men joǵary mektepterdiń biregeıi. Jelilik baǵdarlamanyń grantyna ıe bolǵan jas talapkerler TMD elderiniń, sonyń ishinde Qazaqstan Respýblıkasyndaǵy hımpromnyń iri zaýyttaryn iske qosýǵa qatysýshy bolady», dep atap ótti D. I. Mendeleev atyndaǵy RHTÝ rektorynyń mindetin atqarýshy Ilıa Vorotynsev.
Joba hedlaıneri, TikTok arqyly tanylǵan hımık muǵalim Ulan Úsenov bolashaq hımıkterge mamandyqtyń qyzyqty qyr-syryn tanystyrdy. TMD elderinde tuńǵysh ret iske asyrylatyn joǵary bilim berýdiń jelilik kampýsynyń tanystyrylymyna 600-den asa oqýshylar men stýdentter qatysty.