Astana qalasyndaǵy №2 kópbeıindi qalalyq aýrýhanada jańa gospıtaldyq farmasııa bólimshesi ashyldy, dep habarlaıdy Egemen.kz elorda ákimdiginiń baspasóz qyzmetine silteme jasap.
Aıta ketsek, mundaı joba Astana qalasynda alǵash ret júzege asyrylyp otyr.
«Mundaǵy basty maqsat – preparattardy pasıentterge jetkizýdi ortalyqtandyryp, júıeni sıfrlandyrý. Naýqasqa beriletin dári-dármek mólsheri de avtomatty túrde qadaǵalanyp otyrady. Bólimniń biregeı tusy da osy – dári-dármekti ysyrap qylmaı, artyq shyǵynnyń aldyn alý. Sondaı-aq qate dári-dármek taǵaıyndaý qaýpi ájeptáýir azaıady. Aldyn ala esepteýler boıynsha joba jylyna 400 mln teńgege deıin bıýdjet qarajatyn únemdeýge múmkindik beredi», deıdi elordalyq Qoǵamdyq densaýlyq saqtaý basqarmasynyń basshysy Tımýr Muratov.
Gospıtaldyq farmasııa bólimshesiniń jobasy álemdik tájirıbede keń qoldanysta ári halyqaralyq talaptardyń biri bolyp sanalady. Qazir qala boıynsha 9 aýrýhana bolsa, aldaǵy ýaqytta kópbeıindi aýrýhanalardyń barlyǵynda atalmysh júıeni engizý josparda tur.
«Jobanyń negizgi mindeti – dárigerlerdiń taǵaıyndaýy boıynsha medısınalyq preparattardy ýaqytyly jáne sapaly daıyndaý, olardy medısınalyq uıymnyń klınıkalyq jáne para-klınıkalyq bólimshelerine jetkizý. Dárilik preparattar klınıkalyq farmakologpen ár naýqasqa onyń jasy, salmaǵy, qarsy kórsetkishteri, táýliktik dozasy jáne ózge de ólshemder boıynsha taǵaıyndalady. Bul jobany iske asyrý kezinde bizdiń klınıkada buǵan deıin júzege asyrylǵan Akgıýn aqparattyq júıesiniń daıyndyǵy mańyzdy ról atqardy», dep atap ótti №2 KQA bas dárigeri Nurbol Tursynbaev.
Aýrýhana basshysy mekemeniń eki birdeı ǵımaratyn biriktirip, oǵan qosa qabyldaý bólimshesiniń habyna aınalatyn jańa jobany tanystyrdy. Dál osy tusta balalarǵa arnalǵan jańa travmatologııalyq pýnkt ashý josparǵa engizilgen.
Sondaı-aq pasıentterge bir qadam jaqyndyq – olardy qoldaý qyzmeti, elektrondyq kezekti engizý, pasıentterdi josparly gospıtalızasııalaý algorıtmi boıynsha jumys isteıtin front-ofıs ashyldy. Jaqyn arada barlyq nıet bildirýshilerge onlaın rejımde bos tósek-oryn sanyn kóre alatyn múmkindik týady, bul qyzmet aýrýhana saıtynda da qoljetimdi bolmaq.