О́tken jyly fınalda beldesken qos myqty bıyl taǵy kezdesti. Bul joly Arqalyqtyń balýany Aslan Saǵıtbek jerlesi Almas Jumaǵalıdan basym túsip, «Qostanaı qyrany» belbeýin ıelendi.
Bozkilem sheberi Aslan – búginde oblys quramasyn baptap júrgen Danııar Qarpyqovtyń shákirti.
Qos balýannyń fınaldaǵy beldesýi asa tartysty ótti. Qarsylasyna qaraǵanda shıraq qımyldaǵan Aslan aıaqqa ilip shalý ádisin jasap, eki márte jarty upaı aldy. Osylaısha, týrnır jeńimpazy atanǵan Aslan Saǵıtbek 500 myń teńge, ekinshi orynnan kóringen Almas Jumaǵalı 300 myń teńge, jarystyń qola júldegeri Talǵat Jıentaev 200 myń teńgeniń sertıfıkatyn enshiledi.
Týrnır jeńimpazy aldaǵy ýaqytta Astanada ótetin «Qazaqstan barysynda» óńir namysyn qorǵaıdy.
«Bul jarysta anaý osal, mynaý myqty dep aıta almaımyn. Bári baptyń kelisýine baılanysty. Osy jerge baq synap kelip otyrǵan balýandardyń bári kileń «sen tur, men ataıyn» dep turǵan jigitter. Birinshiden, Allanyń qalaýymen, ekinshiden bapkerlerimizdiń tabandylyǵynyń arqasynda jeńiske jettik. Alda sol kisilerdiń ózimizge artqan úmitin aqtaýǵa tyrysýymyz kerek, – deıdi jarys jeńimpazy.
Qostanaı oblysy