Ázerbaıjannyń astanasy – Bakýde taekvondodan erler men áıelder arasyndaǵy álem chempıonatynyń shymyldyǵy túrildi. Bul jarysta elimizdiń 16 sportshysy kúsh synasyp jatyr.
О́kinishke qaraı, jarystyń alǵashqy kúni olımpııalyq salmaq dárejesinde synǵa túsken eki jerlesimiz de súreńsiz óner kórsetti. 57 kılodaǵy Marııa Sevostıanova tusaýkeser kezdesýinde chehııalyq Hana Flegovadan aılasyn asyrǵanymen, ile-shala brazılııalyq Marııa Klara Lımaǵa jol berdi. 68 kg salmaqtaǵy Eldar Birimbaı da ekinshi kezeńde súrindi. Alǵashynda ol gabondyq Amar Musany utqanymen, kelesi aınalymda 2019 jylǵy álem chempıonatynyń kúmis júldegeri, jastar arasyndaǵy Eýropa chempıony, Gran-prı dodasynyń jeńimpazy ıspanııalyq Haver Pereske ese jiberdi.
Báseke aıaqtalǵan bette BAQ ókilderine suhbat bergen Eldar: «Álemdik dodaǵa ekinshi márte qatysyp otyrmyn. Osydan tórt jyl buryn Manchesterde shırek fınalǵa deıin jetken edim. Osy joly qalaı da júlde alýdy kózdedim. Daıyndyǵym da jaqsy edi. Biraq ózimniń qateligimniń saldarynan qarsylasymnan utyldym», dep ókinish bildirdi.
Jer-jahannyń 145 memleketinen kelgen 950 sportshy óner kórsetip jatqan Bakýdegi báseke 4 maýsymǵa deıin sozylady. Búgin jáne aldaǵy kúnderi burymdylar saıysynda Rıta Bákisheva (46 kg), Botakóz Qapanova (49 kg), Ázıza Qarajanova (53 kg), Nazym Mahmutova (62 kg), Nuraı Qusaıynova (67 kg), Jansel Denız (73 kg) jáne Rakonı Bımyrza (+73 kg) synǵa tússe, erler arasyndaǵy dodada Javohırhon Islamov (54 kg), Samırhon Ábýbákirov (58 kg), Nurbek Gazez (63 kg), Nurqanat Qojahmet (74 kg), Nurlan Myrzabaev (80 kg), Smaıyl Dúısebaı (87 kg) jáne Rýslan Japarov (+87 kg) Qazaq eliniń namysyn qorǵaıdy.