Zamanaýı ınnovasııalyq tehnologııanyń damýy polısııa úshin de qylmystardy ashýdyń jańa múmkindikterin usynyp otyr. Atap aıtqanda, Ishki ister mınıstrligi Qoǵamdyq qaýipsizdikti qoǵammen seriktestikte qamtamasyz etýdiń 2024-2028 jyldarǵa arnalǵan tujyrymdamasy jobasynyń sheńberinde jedel-krımınalıstıkalyq bólinisterdiń qyzmetine ishki ister organdarynda alǵash ret kompıýterlik-tehnıkalyq zertteýler men jeke basty bıometrııalyq sáıkestendirýdiń zamanaýı júıesin engizip jatyr.
«Digital Crime Lab» (DCL) – dáleldemelerdi taldaýǵa arnalǵan zamanaýı sıfrlyq krımınalıstıkalyq zerthana. Ol sıfrlyq izderdi paıdalaný arqyly qylmystardy tergep-tekserýge arnalǵan. Zerthana krımınalısteri eki baǵytta jumys isteıtin bolady, atap aıtqanda, olar – kompıýterlik-tehnıkalyq zertteýlerdi júrgizý jáne adamdardy sáıkestendirý júıesi.
Kompıýterlik-tehnıkalyq zertteýlerdiń maqsaty – kompıýterlik quraldardy, aqparatty elektrondyq tasymaldaǵyshtardy, baǵdarlamalyq qamtylymdy, baılanys quraldaryn jáne arnaıy qurylǵylardy (mobıldik telefondardy, planshetterdi, organaızerlerdi jáne t.b.), aqparatty avtomattyq óńdeý qurylǵylaryn (serverlerdi) jáne telekommýnıkasııalyq qural-jabdyqty zertteý arqyly derekterdi alý.
Onyń zertteý nysandary – derbes kompıýterler, olarǵa jáne lokaldyq jelilerge arnalǵan ártúrli operasııalyq júıeler, ártúrli qoldanbaly baǵdarlamalyq ónimder (jalpy maqsattaǵy qosymshalar: mátindik jáne grafıkalyq redaktorlar, derekqorlardy basqarý júıeleri, elektrondyq kesteler jáne t.b.), onyń ishinde oıyn qosymshalary, mýltımedıa formattardaǵy derekter.
Osylaısha, krımınalıstıkalyq sıfrlyq zerthana qysqa merzimde kúdikti adamdardy anyqtaýǵa, quqyqqa qaıshy áreket jasaǵan adamdardy tabýǵa, quqyq buzýshylyqtardy tergep-tekserý kezinde dáleldemelik bazany bekitýge múmkindik bermek.
Bul is-sharalar jasalǵan quqyq buzýshylyq úshin jazadan bultartpaıdy jáne quqyqqa qaıshy áreketterdiń aldyn alýdyń úzdik tásili bolyp sanalady. Polısııa qyzmetkerleriniń aıtýynsha, ol el azamattardyń qaýipsizdigin arttyryp, halyqtyń polısııaǵa degen senim deńgeıin kóteredi.
Baǵdarlamalyq-apparattyq keshender men baǵdarlamalyq qamtylymdardyń kómegimen aqparatty qalpyna keltirýge bolady. Eger sapaly foto, beınematerıaldar usynylsa, quqyq buzýshylyq jasaǵan adamdardy tez anyqtaýǵa bolady.