Búgin Rım Papasy Fransısk aýrýhanaǵa jatqyzyldy, dep habarlaıdy Egemen.kz ANSA aqparat agenttigine silteme jasap.
Vatıkannyń resmı ókili Matteo Brýnıdiń aıtýynsha, pontıfık Djemellı aýrýhanasynda jasalǵan otadan keıin qalpyna kelý úshin birneshe kún baqylaýda bolady.
86 jastaǵy pontıfıktiń densaýlyǵynda birqatar kinárat bar ekeni buryn da habarlanǵan edi.Rım Papasynyń tizesi únemi aýyratyndyqtan, ol múgedekter arbasynda otyrýǵa májbúr.
«Otadan keıin ol tolyq qalpyna kelýi úshin birneshe kún medısınalyq mekemede bolady», dep túsindirdi Matteo Brýnı.
Buǵan deıin Papa Fransısk apta saıynǵy aýdıensııasyn qalypty rejımde ótkizgen. Alaıda josparly ota týraly aldyn ala habarlanbaǵan.
Aıta ketsek, 2021 jyly Rım Papasy ishek aýrýynan aıyǵý úshin toq ishektiń bir bóligin alyp tastaǵannan keıin aýrýhanada 10 kún jatqan. Jaqynda ol sol dertke qaıta shaǵymdana bastady.
Densaýlyǵyndaǵy kinárattarǵa qaramastan, Rım Papasy Fransısktiń kestesi áli de tyǵyz ekenin aıta ketken jón. Máselen, tamyz aıynda Rım Papasynyń Portýgalııa men Mońǵolııaǵa jumys sapary josparlanǵan.