Abaı oblysynyń ákimdigi orman órtine baılanysty jaǵdaıdy baıandady, dep habarlaıdy Egemen.kz.
Qazir Abaı oblysynda úsh baǵytta (ońtústik, batys jáne shyǵys jıekte) órtti sóndirý jumystary jalǵasyp jatyr. Shyǵys baǵytta aýyr tehnıkamen mıneraldanǵan jolaqtar jasaý jumystary júrgizilýde.
Jergilikti ákimdiktiń málimetinshe, órtti sóndirýge TJM, Orman sharýashylyǵy komıtetinen, jergilikti atqarýshy organdardan jáne Qorǵanys mınıstrliginen 1 500-ge jýyq adam, 300-den astam birlik tehnıka jumyldyrylǵan.
Sonymen qatar órt aýmaǵyn aerovızýaldy tekserý jáne órt oshaqtaryna áýeden sý tógýdi júzege asyrý úshin 14 tikushaq tartyldy. О́rtti sóndirý jumystary bastalǵannan beri órt oshaqtaryna áýeden 621 ret sý tógildi, jalpy kólemi 1 900-ge jýyq tonnany quraıdy.
Tótenshe jaǵdaılar mınıstri general-maıor Syrym Sháriphanov pen Qorǵanys mınıstri general-polkovnık Rýslan Jaqsylyqov órt sóndirý jumystaryn úılestirý úshin oqıǵa ornyna ketti.
Budan basqa, TJM-ge habarlama kelip túsken sátten bastap oqıǵa ornynda TJM Apattar medısınasy ortalyǵy fılıaldarynyń brıgadalary qyzmet kórsetip jatyr.
Qazirgi ýaqytqa deıin jedel jelige 104 qońyraý túsken. TJM jáne TJD jedel jeli telefondary: 8 7172 53 32 84, 8 722 235 38 31.
Meteojaǵdaıdyń ózgerýine baılanysty (jeldiń ekpini sekýndyna 18 metrge deıin) órt tómengi bólikte órbip, Talısa aýylyna qaraı baǵyt aldy. Aýyldy qorǵaýǵa órt tehnıkasy jumyldyryldy. Turǵyndar aldyn ala evakýasııalandy.