Aýyl sharýashylyǵyna trıllıondaǵan teńge jumsalyp jatyr, alaıda nátıje joq. Búgin Máýlen Áshimbaev agroónerkásip salasyndaǵy qarjyny tıimsiz paıdalanýdy synǵa aldy, dep habarlaıdy Egemen.kz Senattyń baspasóz qyzmetine silteme jasap.
«Sońǵy 5 jylda tek aýyl sharýashylyǵynyń ózine 2 trıllıon sýbsıdııa berildi. Soǵan qaramastan ótken jyly azyq-túlik ımportynyń 20 paıyzǵa óskenin kórip otyrmyz. Qyrýar qarjy salynyp jatyr. Degenmen, bul jerde qaýip te joq emes. Reseı rýbli qunsyzdanyp barady. Tıisinshe, ımporttyq ónim arzandaıdy. Osylaısha bizdiń ónim óndirýshiler tıimsiz jaǵdaıǵa tap boldy. Biz oqshaýlanǵan el emespiz, Reseımen arada kedendik baj da joq. Sáıkesinshe munyń bári bizge áser etip otyr. Bizdiń osy baǵytqa jumsaǵan qarjymyz, jalpy is-áreketimiz qanshalyqty tıimdi?», dep Máýlen Áshimbaev Aýyl sharýashylyǵy mınıstrine suraq qoıdy.
Senat Tóraǵasy bul máselege qaıta oralyp, ony aldaǵy Úkimet saǵatynda jan-jaqty talqylaýdy usyndy.
16 maýsymda Parlament Senatynda aýyl sharýashylyǵyndaǵy eksport jáne ımportty almastyrý máseleleri boıynsha Úkimet saǵaty ótedi.