El turǵyndaryn jylý, elektr energııasy, sý jáne basqa da kommýnaldyq qyzmettermen úzdiksiz qamtamasyz etý maqsatynda turǵyn úı-kommýnaldyq sharýashylyǵy ınfraqurylymynda qordalanǵan máselelerdi sheshý úshin «Tarıfti ınvestısııalarǵa aıyrbastaý» baǵdarlamasy iske asyrylyp jatyr. Oǵan sáıkes 2023-2029 jyldarǵa 62 myń km ınjenerlik jelilerdi jańǵyrtý úshin shamamen 3 trln teńge ınvestısııa tartý kózdelip otyr. Sondaı-aq atalǵan baǵdarlama aıasynda jergilikti bıýdjet qarajaty esebinen az qamtylǵan otbasylarǵa kommýnaldyq qyzmetterge aqy tóleý úshin turǵyn úı kómegi qarastyrylǵan.
Búgingi tańda Ulttyq ekonomıka mınıstrligi turǵyn úı-kommýnaldyq sharýashylyq kásiporyndarynyń tarıfter men ınvestısııalyq baǵdarlamalardy ózgertýge qatysty (jóndeý jumystary men qyzmetkerlerdiń jalaqysyn ósirý, qaraýsyz jatqan jelilerdi qaraý jáne t.b.) 212 ótinimin bekitti. Sonyń nátıjesinde kommýnaldyq qyzmetter tarıfteriniń ózgerýi 10-30%-dy qurady, munda tutynýshylar men kommýnaldyq qyzmetter múddeleriniń teńgerimi eskerilgen. Osyǵan oraı halyqtyń áleýmettik jaǵynan az qamtylǵan toptarynyń kommýnaldyq qyzmetterge jumsalatyn shyǵyndardyń bir bóligi óteletin bolady. Mundaı tetik memlekettik turǵyn úı kómegin kórsetý aıasynda kózdelip otyr. Ol az qamtylǵan otbasylarǵa nemese azamattarǵa kommýnaldyq qyzmetter (jylý, elektr jáne sýmen jabdyqtaý, baılanys, lıft qyzmeti jáne t.b.) shyǵyndaryn óteý úshin toqsan saıyn tólenedi. Basty shart – tólem alýshynyń menshiginde Qazaqstan aýmaǵynda bir ǵana baspana bolýy kerek nemese ol memlekettik turǵyn úı qorynan, jeke menshik turǵyn úı qorynan jergilikti atqarýshy organ jaldaǵan baspanany jalǵa alýshy (teń jalǵa alýshy) bolýǵa tıis.
Turǵyn úı kómegi degenimiz – az qamtylǵan otbasylarǵa (azamattarǵa) jeke turǵyn úıdi nemese onyń memlekettik turǵyn úı qorynan alynǵan nemese jergilikti atqarýshy organ jaldaǵan onyń bir bóligin ustaýǵa ketken shyǵyndar arasyndaǵy aıyrmashylyqty óteý úshin beriletin tólem jáne Qazaqstan Respýblıkasynyń «Turǵyn úı qatynastary týraly» zańynda belgilengen tártippen jergilikti ókildi organdar belgilegen, az qamtylǵan otbasylardyń (azamattardyń) osy maqsattarǵa arnalǵan shyǵystarynyń shekti deńgeıi.
Indýstrııa jáne ınfraqurylymdyq damý mınıstrliginiń Turǵyn úı qatynastary basqarmasynyń basshysy S.N.Jalquldyń málimdeýinshe: «Bıyl Úkimet engizgen ózgeristerge sáıkes eger kommýnaldyq qyzmetterge jumsalatyn soma otbasynyń nemese azamattyń bir aıdaǵy jıyntyq tabysynyń 10%-nan asatyn bolsa, turǵyn úı kómegi beriledi. Buryn bul kórsetkish ár óńirge baılanysty 2-20% aralyǵynda bolǵan. Bul rette jergilikti ákimdikter ruqsat etilgen shekti deńgeıdi 10%-dan tómendetýge quqyly».
Mysaly, eger otbasynyń nemese azamattyń bir aıdaǵy jıyntyq tabysy 100 myń teńgeni, al kommýnaldyq qyzmetterge jumsalatyn shyǵyny 15 myń teńgeni (tabystyń 10%-dan astamyn) qurasa, onda azamattyń jergilikti bıýdjet qarajaty esebinen ótem alýǵa quqyǵy bar.
Úkimet bekitken túzetý bolashaq turǵyn úı kómegin alýshylardy qamtýdy ulǵaıtýǵa jáne az qamtylǵan azamattarǵa qarjylyq júktemeni azaıtýǵa baǵyttalǵan.
Jalpy, keıingi 4 jylda 174 myńnan astam abonentke turǵyn úı kómegi úshin jalpy somasy 5 mlrd teńge tólendi. Al osy jyldyń 6 aıynda 31 myń otbasyna 630,5 mln teńgege kómek kórsetildi.
Osylaısha, kommýnaldyq qyzmetter tarıfteri kóterilgen jaǵdaıda ótemaqy ulǵaıady da, az qamtylǵan azamattardyń shyǵyndary ulǵaımaıdy. Turǵyn úı kómegin taǵaıyndaý úshin azamattar qajetti qujattar jıyntyǵyn túgendep, turǵylyqty jeri boıynsha ákimdikke júginýi kerek. Turǵyn úı kómegin onlaın-qyzmet arqyly da, halyqqa qyzmet kórsetý ortalyǵy arqyly da alýǵa bolady.