Bul kúnderi Ońtústik Koreıanyń Chhanvon qalasynda ótip jatqan nysana kózdeýden jasóspirimder arasyndaǵy álem chempıonatynda Qazaqstan qorjyny taǵy tórt júldemen tolyqty.
Sportty damytý dıreksııasynyń málimeti boıynsha, jyljymaly nysana kózdeýde (10 m)
Qazaqstan áıelder quramasy fınaldyq saıysta Ýkraına qyzdarynan basym túsip, álem chempıonatynyń altyn júldesin jeńip aldy. Bul synda el namysyn ápkeli-sińlili Zýhra jáne Fatıma Irnazarova men Aleksandra Sádýaqasova qorǵap, osy jattyǵýdaǵy eresekter arasyndaǵy álem rekordyn tirkegenin de (1686 upaı) aıta ketken jón.
Al dál osy qashyqtyqtaǵy saıysta elimizdiń erler quramasy Ýkraına sportshylaryna jol berip, kúmis medal ıegeri atandy. Sondaı-aq jyljymaly nysana kózdeýde jekeleı synda Fatıma Irnazarova tuǵyr bıiginiń ekinshi satysynan kórindi. Ol fınalda ýkraınalyq Margarıta Tarkanıge (6-4) ese jiberdi. Fatıma irikteýde 572 upaı jınady. Sondaı-aq buǵan deıin el qorjynyna altyn júlde salǵan Nıkıta Chırıýkın 25 metrden tapanshamen (standart) oq atýda kúmis júldege ıe boldy (572 upaı). Otandasymyz tek jarys qojaıyny Sýk Jın Hongqa ese jiberdi (578 upaı).