«Jaıly mekteptiń» jaıbaraqat merdigerleri

10 bilim berý nysanynyń qurylysy bıyldan bastaldy. Iаǵnı Qaraǵandyda – tórt, Bal­qashta – bir, Buqar jyraý aýda­nynda – úsh, Shet aýdanynda eki nysannyń qurylysy salynady. Olardy 2024 jyly belgilengen merzimde tapsyrý qajet. Qalǵan segiz mek­tep 2024-2025 jyldar­ǵa jospar­lanǵan. Olar Qaraǵan­dy, Abaı, Qarqaraly, Prıozersk qalasynda jáne Nura kentinde salynatyn bolady. Sapasy da asa mańyzdy. Sol sebepti, «Jaıly mektepterdiń» qurylysy qatań baqylaýda bol­maq.

Aımaqtaǵy «Jaıly mektep» jo­basy boıynsha mektep salýdy utyp alǵan merdigerler sharýa­laryn shıratpasa bolmaıdy. Qurylysty keshiktiretin bol­sa, keshirim joq. Jaýaptylar qury­lys júrgizýdegi kesteden 7 kún keshikse, «Samruk-Kazyna Construc­tion» basqarmasy merdigermen kelisimshartty birden buzady. Osyndaı máselege ekinshi márte tap bolsa, onda tipti, «qosh» aıtysady. Endi kompanııadan apta saıyn tehnıkalyq esepter talap etiledi. Qaraǵandy oblysyndaǵy «Jaıly mektep» jobasy boıynsha salynyp jatqan 10 mektep­tiń qurylysyn kózben kórýge arnaıy kelgen «Samruk-Kazyna Construction» basqarma tóraǵasy Máýlen Aımanbetov merdigerlerge osyndaı qatań talap qoıyp ketti.

«Jaıly mektep» ulttyq jo­ba­sy aıasynda jańa mektepter­di tur­ǵyzatyn merdiger kompanııa­lar­dyń ókilderimen tóraǵa Máýlen Aımanbetov kabınetke emes, qu­rylys alańynda kezdesý ótkizdi. Joǵarydaǵy talaptardy sonda qoıdy. Onymen qosa, merzimderdi keshiktirgen kompanııalarǵa qandaı jaýapkershilik qarastyrylǵanyn qadap aıtty.

«Apta saıyn atqarýshylyq tehnıkalyq esepterdi ýaqtyly tapsyryńyzdar. Kem degende, eki ret merzimdi buzyp, jumystardy keshiktirgen jaǵdaıda shartty buzamyz. Al jobany konkýrsta ekinshi oryn alǵan kompanııaǵa beremiz. О́zderińizge eskertemin. Baqylaý qatań bolady! Biz sapaǵa basymdyq beremiz» , dedi Máýlen Aımanbetov.

Eger merdiger qurylys ju­mys­taryn oryndaý merzimin be­ki­tilgen kesteden kem degende eki ret 7 kúnnen artyq ýaqytqa ke­shiktirse, kelisimshart birjaqty tár­tippen buzylady. Ári qaraı mek­tep qurylysy konkýrsta ekin­shi oryn alǵan kompanııaǵa se­nip tapsyrylady. Ol talaptarǵa saı kelmese, onda jańa merdi­ger bir kóz­den satyp alý arqyly anyq­­talady. «Samruk-Kazyna Construction» basshylyǵy barlyq jaı­­ly mektepti ýaqtyly salyp, bel­gi­lengen mejede tapsyrý úshin talap kúshti ekenin atap ótti.

Sapar barysynda basqarma tór­aǵasy Qaraǵandydaǵy «Keń dala» shaǵyn aýdanynda 2000 oqý­shyǵa arnalǵan jaıly mektep salý josparyn talqylaýǵa qatysty. Onda mektepke tıesili aýmaqty ońtaılandyrýǵa baılanysty óz usynystaryn jetkizdi. Irgeles alań­da trıbýnalary bar kóp fýnksıo­naldy stadıon ornatylady. Munda oqýshylar­dyń jyly kezde fýtbol, qysta hokkeı oınaýyna múmkindik bar. «Jalpy, basqarma ustanǵan qa­ǵı­dat – mekteptiń ár sharshy metrin tıimdi paıdalaný», deıdi jaýapty ókilder.

 «Mektep aýmaǵynyń ár sharshy metrin barynsha tıimdi paıdalaný kerek. Eýropalyq mektep­terde bos oryn joq. Máselen, nege aýmaqta aınalmaly júgirý jo­laǵyn jasamasqa? Ol úshin arna­ıy oryn qarastyrýdy usyna­myn. Qysta shańǵy tebýge, jazda jú­gi­rýge bolady. О́zim de mektepte oqy­ǵanda júgirýge qatysyp, nor­matıvtiń birinshi razrıadyn alǵan­myn. Sol ýaqytta mektep ala­ńynda júgiretinbiz», deıdi tóraǵa.

 Bul shaǵyn aýdandaǵy mektepti salýǵa daıyndyq kestege sáıkes júrip jatqanymen, ýchaske arqyly káriz jelileri men sý qubyry ótedi. Bul aıtarlyqtaı qolaısyzdyq týdyryp otyr. Basqarma tóraǵasy merdiger kompanııaǵa, «BI Global» JShS-ǵa, jelilerdi óz kúshimen shy­ǵarýdy uıymdastyrýdy tapsyrdy.

Máýlen Aımanbetov Qaraǵan­dydaǵy «Gúlder» shaǵyn aýdanynda salynatyn 300 oryndyq mekteptiń qurylys alańynda da boldy. Bolashaq jaıly mektep­tiń ýchaskesin tekserý kezinde «SK Construction» basshysy nysannyń josparyn qaıta qarastyrýdy júktedi.

Jańa mektep qazir jumys istep turǵan bilim oshaǵynyń janyna salynady. Sol sebepti, «Stınk TFK» JShS qurylys kompanııa­sy qalanyń sáýlet bólimimen birlesip, qoldanystaǵy mekteptiń ýchaskesin kesip, syrtqy sport ǵımarattaryn standarttarǵa saı etip jasaýy úshin qajet emes nysandardy alyp tastaýy qajet. Osy boıynsha jumystardy da jedeldetýdi júktedi tóraǵa.

«Jobalaý kezinde mindetti túr­de kireberis joldardyń bo­lýyn qamtamasyz etińizder. Jol­dar men kólik turaǵy jergilikti tur­ǵyndarǵa kedergi keltirmeýge tıis. Bul máseleni jergilikti atqarýshy organdarmen pysyqtaý qajet», dedi Máýlen Aımanbetov.

Sonymen qatar «SK Construc­tion» basshysy 300 oqýshyǵa shaq­­talǵan Úshtóbe aýylyn­da­ǵy jaıly mekteptiń qurylysyna ­da­ıyndyqty jedeldetýdi tap­syr­dy. Tóraǵa jumys keshigip jatqanyn, álsizdigin atady. Mer­diger kompanııa «Astana Kok­tem S» JShS mektep sa­lyna­tyn ýchaskeni qorshaǵan. Beı­ne­ba­­qy­laý kameralaryn ornat­qan. Alaı­da nysandy orna­la­s­tyrý ju­mystaryn áli basta­ma­ǵan. О́ıt­keni jaýapty zerthana geo­lo­gııalyq izdestirý qorytyndy­syn áli kúnge deıin bermegen. «SK Constuction» basshysy máseleni shuǵyl túrde sheshýdi mindettedi.

«Tıisti kelisim jasap, ju­mys­ty jedeldetýge ruqsat alyńyzdar. Sizder qazirdiń ózinde keshigip jatyrsyzdar», dep eskertti tóraǵa.

 Bul mektepter 2024 jyldyń sońyna deıin paıdalanýǵa beriledi dep josparlanyp otyr. Qurylys tolyq aıaqtalǵannan keıin barlyq jaıly mektep jergilikti atqarýshy organdardyń balansyna ótedi.

Qasymhan ǴALYM,«Egemen Qazaqstan»