Kásibı tennısshiler qaýymdastyǵy (ATP) men Áıelder tennıs qaýymdastyǵy (WTA) tennısshilerdiń jańartylǵan reıtıngin jarııalady.
Erler arasyndaǵy reıtıngte elimizdiń birinshi raketkasy Aleksandr Býblık bir saty joǵarylap, 26-orynǵa jaıǵasty. Ekinshi nómirli tennısshimiz Tımofeı Skatov 134-ten 136-ǵa, Mıhaıl Kýkýshkın 223-ten 229-ǵa, Beıbit Juqaev 242-den 270-ke tómendedi. Birer kún buryn juptyq synda alǵash ret ATP 250 týrnıriniń chempıony atanǵan Aleksandr Nedovesov 53-ten 8 saty joǵarylap, álemniń 45-raketkasy atandy. Bul – onyń óz karerasyndaǵy eń úzdik kórsetkishi. Nedovesov osyǵan deıin 48-orynnan asa almaǵan edi. Erler arasyndaǵy reıtıngte ıspanııalyq Karlos Alkaras kósh bastap tur. Ekinshi orynǵa serbııalyq sańlaq Novak Djokovıch jaıǵassa, úzdik úshtikti reseılik Danııl Medvedev túıindegen.
Áıelder tennıs qaýymdastyǵynyń (WTA) jekeleı syndaǵy reıtınginde de úzdik úshtik ózgerissiz qaldy. Birinshi orynda ádettegideı polshalyq Iga Shvıontek tursa, odan keıingi oryndarǵa belarýs Arına Sobolenko jáne Qazaqstan ókili Elena Rybakına jaıǵasqan. Al Iýlııa Pýtınseva eki oryn joǵary kóterilip, 58-orynǵa jaıǵasty. Elimizdiń juptyq syndaǵy úzdik tennısshisi Anna Danılına 25-orynda, Rybakına – 107, Jibek Qulambaeva 179-satyda tur.