Elimizde týrızm salasyn damytýdyń 2023-2029 jyldarǵa arnalǵan tujyrymdamasy qabyldandy. Maqsaty – týrızmdi eldiń ekonomıkalyq damýynyń basym baǵytyna aınaldyrý. Atap aıtqanda, osy saladaǵy jumyspen qamtylǵan azamattardyń sanyn – 800 myń, al saladaǵy jalpy qosymsha qun kólemin 6 trln teńgege deıin ulǵaıtý kózdelgen. Sonymen qatar qonaqúı jáne tamaqtaný qyzmetterindegi ınvestısııa ósimin 260 mlrd teńgege deıin arttyrý josparlanǵan.
Mádenıet jáne sport mınıstri Ashat Oralovtyń aıtýynsha, kóshi-qondy baqylaý eQonaq elektrondy júıesi jáne arnaıy mobıldi qosymshalardy engizý arqyly iske asady. Sondaı-aq ýákiletti organdarmen birlesip, vızalyq, kóshi-qon saıasatyn lıberalızasııalaýǵa baılanysty táýekelderdiń aldyn alý jóninde is-sharalar qabyldanady.
«Týrızmge jumsalǵan qarajattyń tıimdiligin anyqtaý úshin týrıstik ınfraqurylymnyń damý deńgeıi boıynsha óńirlerdiń ulttyq reıtıngin engizý josparlanyp otyr. Reıtıng Qazaqstannyń týrıstik kartasyna engizilgen basym baǵyttar men TOP-50 destınasııany qamtıdy. О́ńirlik týrızm salasyndaǵy shaǵyn, orta jáne iri ınvestısııalyq jobalardy iske asyrýǵa jeke kapıtal tartylady. Mańǵystaý oblysy, Túrkistan oblysy, Almaty taý-shańǵy klasteri jáne basqa da oryndar basym aımaqtar retinde qaralady», deıdi vedomstvo basshysy.
Sonymen qatar týrızmdi damytý sheńberinde erekshe qorǵalatyn tabıǵı aýmaqtarda AQSh, Aýstralııa jáne Grýzııa sııaqty elderdiń tájirıbesi qoldanylmaq. Qazaqstannyń mańyzdy tabıǵı nysandaryn saqtaý úshin ınvestorlar tartylyp, memlekettik ulttyq tabıǵı parkterdiń ınfraqurylymyn damytý jalǵasady. Mysaly, Imantaý-Shalqar kýrortty aımaǵyn damytý aıasynda Soltústik Qazaqstan oblysynda ornalasqan jerdiń týrıstik-rekreasııalyq qyzmetiniń jol kartasyn ázirleý josparlanyp otyr.
«Eldegi týrızm salasyn damytýdyń jańa tujyrymdamasyna sáıkes Tótenshe jaǵdaılar mınıstrligine (TJM) qarasty aýmaqtyq bólimshelerine týrısterdiń júrip-turý marshrýttary týraly habardar etý boıynsha talap engiziledi. Bul aqparat izdeý is-sharalaryn ýaqtyly uıymdastyrý jáne qajet bolǵan jaǵdaıda medısınalyq kómek kórsetý nemese evakýasııalaý úshin asa mańyzdy. Sondaı-aq el boıynsha týrıstik joldardy tańbalaý jónindegi standart qabyldanady. Marshrýttardy bólý týrısterdiń daıarlyq deńgeıi men kúrdeliligine qaraı júrgiziledi. Ár sanat belgili bir túske sáıkes jasalyp, soqpaqtyń basynda onyń kúrdeliligi jáne týrıstke qajetti talaptar týraly aqparat ornalastyrylady. Derekter, aqparattyq qalqandar men stendterdi ornatý, týrısterge durys baǵyt-baǵdar alýǵa jáne saıahattyń qaýipsizdigin qamtamasyz etýge múmkindik beredi», deıdi A.Oralov.
Týrızm salasynda kadr daıarlaý júıesin jetildirý jónindegi is-sharalar da júzege asyrylady. Mysaly, tujyrymdama sheńberinde halyqaralyq sarapshylardy tarta otyryp, bilim berý baǵdarlamalaryn daıyndaýǵa arnalǵan ádisnamalyq usynymdar ázirleý, aǵylshyn tilindegi pánder úlesin arttyrý jáne bıznes ókilderin bilim berý baǵdarlamalary men oqý-ádistemelik materıaldardy ázirleýge tartý qarastyrylǵan. Qonaqúı menedjerlerin, týroperatorlardy jáne «Bolashaq» baǵdarlamasynyń túlekterin oqytý men dıplom jumystaryna basshylyq etýge tartý múmkindigi, sondaı-aq oqytý baǵdarlamalaryna qysqamerzimdi kýrstardy engizý múmkindigi de qaralady.
«Halyqaralyq tájirıbe kórsetkendeı, búginde aýqymdy jáne tanymal is-sharalardy, sporttyq jarystardy ótkizý týrısterdi tartýdyń eń tıimdi quraldarynyń birine aınaldy. Osy baǵyt boıynsha da biraz jumys atqarylady. Eldegi MICE-týrızmniń áleýetin eskere otyryp, bul baǵytty halyqaralyq tájirıbege saı damytýdy josparlap otyrmyz. Qazaqstannyń MICE-destınasııalary halyqaralyq arenada, onyń ishinde halyqaralyq qaýymdastyqtar platformalary arqyly nasıhattalady. MICE-týrızm ókilderi elge MICE-is-sharalardy tartýmen belsendi aınalysady», deıdi mınıstr.
Sondaı-aq týrızmdi damytý tujyrymdamasy boıynsha, mádenı-tanymdyq týrızm, agrotýrızm, áleýmettik, medısınalyq, ekologııalyq, iskerlik, balalar-jasóspirimder jáne týrızmniń basqa da túrleri damytylady. Týrızmniń árbir basym baǵytyn jeke qarastyrylyp, ekotýrızmdi damytý úshin ekotýrızm sýbektilerin erikti sertıfıkattaýdy engizý, sertıfıkattalǵan qonaqúılerdi onlaın brondaý platformasyn qurý, tabıǵatqa uqypty qaraý jóninde aqparattyq naýqan júrgizý josparlanǵan.
Mınıstrdiń aıtýynsha, agrotýrızm salasynda bolashaǵy zor oryndardy anyqtaý jáne aýyl turǵyndary úshin oqytý is-sharalary júzege asyrylatyn óńirlerge baryp dalalyq zertteýler júrgiziledi. Agrotýrızmde qyzmet kórsetetin sýbektilerdiń tizilimin jasaý jáne júrgizý, óńirlerge ınvestısııa tartý, aýyldardyń ınfraqurylymyn jaqsartý jáne aýmaqtar brendıngin damytý josparlanyp otyr. Fermerlerge aýyl sharýashylyǵy maqsatyndaǵy jerlerde agrotýrızmmen aınalysýǵa múmkindik berý bóliginde zańnamany jetildirý qarastyrylady.
Sala mamandarynyń boljamy boıynsha, joǵaryda atalǵan barlyq baǵyt boıynsha belsendi jumys 2030 jylǵa deıin óz jemisin berip, ishki týrıster sanyn 11 mln adamǵa, al sheteldik týrıster sanyn 4 mln adamǵa deıin arttyrýǵa bolady.