2023 jylǵy shildede jyldyq mándegi ınflıasııa deńgeıi 14% boldy. Azyq-túlik taýarlarynyń baǵasy 13,5%-ǵa, azyq-túlikke jatpaıtyn taýarlar 15%-ǵa, aqyly qyzmetter 13,6%-ǵa ósken. Bul týraly Ulttyq statıstıka bıýrosy habarlady.
2022 jylǵy shildemen salystyrǵanda keńse taýarlary – 64,4%, kúrish – 44,3%, qantsyz qoıýlandyrylǵan sút – 42,4%, kúndizgi stasıonarlyq emdeý – 40,8%, ydys jýýǵa arnalǵan quraldar – 37,4%, kir sabyn – 35,9%, qyryqqabat – 27,5%, tosap, djem 25,9%-ǵa qymbattady. Kerisinshe, jyldyq mánde qumsheker – 17,4%, qaraqumyq jarmasy – 10,5%, kúnbaǵys maıy – 4,7%, qyzylsha – 6,1%, sábiz – 3,4%, kartop 1,3%-ǵa arzandaǵan.
Inflıasııa deńgeıin sıpattaıtyn tutyný baǵalary ındeksiniń kórsetkishi aı saıyn esepteledi. Qyzmetter men taýarlardyń tarıfteri men baǵalary – barlyǵy 508 pozısııa boıynsha baqylanady. Baǵalardy tirkeý barlyq oblys ortalyǵynda, astanada jáne qalalar men aýdan ortalyqtarynyń belgili bir sheńberinde ártúrli menshik nysanyndaǵy saýda jáne qyzmet kórsetý salasy kásiporyndarynyń iriktemeli jelisi boıynsha júrgiziledi.
Jalpy alǵanda, tamaqtaný ónimderi men alkogolsiz sýsyndar, turǵyn úı qyzmetteri, kıim jáne aıaqkıim, ártúrli taýar men qyzmet jyldyq ınflıasııaǵa erekshe úles qosqan.
Sarapshylardyń aıtýynsha, servıstik qyzmetter esebinen aılyq ınflıasııa ósimin esepke almaǵanda, tutynýshylyq ınflıasııanyń ári qaraı da baıaýlaýy baıqalady. О́tken aıdan beri janar-jaǵarmaı jáne turǵyn úı-kommýnaldyq sharýashylyq baǵalary qymbattaı bastady. Bul da óz kezeginde baǵa ósiminiń baıaýlaýyn tejeıdi.