Oblys ákimi Ermaǵanbet Bólekpaev 90 jasqa tolǵan kórnekti akademık, tanymal ustaz, qoǵam qaıratkeri Zeınolla Moldahmetovti qabyldap, mereıtoıymen quttyqtady. Aımaq basshysy el Prezıdenti Qasym-Jomart Toqaevtyń quttyqtaý hatyn jetkizdi. Sáýleli sát ármen qaraı E.Bóketov atyndaǵy Qaraǵandy ýnıversıtetinde uıymdastyrylǵan ǵylymı konferensııaǵa jalǵasty.
Memleket basshysynyń quttyqtaý hatynda «Torqaly toqsan jasqa tolǵan mereıtoıyńyz qutty bolsyn! Halqymyz ózińizdi kórnekti ǵalym, ulaǵatty ustaz, ultjandy azamat retinde jaqsy biledi jáne qurmetteıdi. Elimizdiń oqý-aǵartý salasyn damytýǵa qosqan úlesińiz óte mol. Uzaq jylǵy ǵylymı-pedagogıkalyq qyzmetińiz jáne boıyńyzdaǵy asyl qasıetterińiz Sizdi abyroı bıigine kóterdi», delingen.
– Zeınolla Moldahmetov qaraǵandylyqtarǵa ǵana emes, búkil respýblıkaǵa tanymal jáne elimizde zor bedelge ıe. Ol – bilim, ǵylym jáne jalpy rýhanı damý salasynda biregeı tulǵa. Ǵylym men qoǵamnyń damýyna bulaısha úles qosý ekiniń biriniń qolynan kelmeıdi, – dedi qoǵam qaıratkeri Birǵanym Áıtimova.
1980 jyly Zeınolla Moldahmetov Qaraǵandy memlekettik ýnıversıtetiniń tizginin óziniń aǵa-ustazy Evneı Bóketovten keıin alǵan. Ýnıversıtet tarıhyndaǵy ekinshi rektor. Ataqty Evneı Arystanulynan bata alyp bastaǵan jaýapty qyzmetin segiz jyl atqarady. Basshylyq etken jyldary fızıka-matematıka fakýltetiniń oqý-laboratorııalyq korpýsy men stýdentter mádenıet saraıy, oqytýshylarǵa arnalǵan seksen páterlik turǵyn úı boı kóterdi. Sondaı-aq qalanyń ońtústik-shyǵysyndaǵy ýnıversıtet qalashyǵy men bıologııa fakýlteti ǵımaratynyń qurylysy bastalǵan. Ǵalymnyń tusynda osyndaı ıgilikti sharalar qolǵa alynyp, júzege asqan.
Z.Moldahmetov 350-den astam ǵylymı eńbek, 6 monografııa jazdy. Fızıkalyq hımııa salasynda mańyzdy zertteýler júrgizgen. Ǵylym salasyndaǵy jemisti jáne kópjyldyq eńbegi úshin Eńbek Qyzyl Tý, «Qurmet belgisi» ordenderiniń laýreaty atandy. «Eren eńbegi úshin» jáne «Qazaqstan ǵylymynyń eńbek sińirgen qaıratkeri» medaldarymen marapattalǵan.
Ol 1933 jyldyń 3 tamyzynda Soltústik Qazaqstan oblysynyń Oktıabr aýylynda dúnıege kelgen. 1965 jyldan bastap Qaraǵandy qalasynda turady. Qalanyń ǵylymı jáne bilim berý áleýetin qalyptastyrýǵa, damytýǵa, joǵary bilikti kadrlar daıarlaýǵa, óskeleń urpaqty tárbıeleýge qosqan zor úlesi men qala ómirine belsendi qatysqany úshin 2001 jyly «Qaraǵandy qalasynyń qurmetti azamaty» ataǵyna ıe boldy.
Konferensııaǵa otandyq jáne sheteldik ǵalymdar men ustazdar, zııaly qaýym ókilderi kelip, Zeınolla Moldahmetovtiń ǵylymǵa sińirgen eńbekterine sholý jasady. Sonymen qatar «Jasandy ıntellekt» taqyryby konferensııaǵa arqaý boldy.
Qasymhan ǴALYM,
«Egemen Qazaqstan»
Qaraǵandy oblysy