Jetisýda nóserlep quıǵan jaýyn-shashynnyń saldarynan birneshe eldi mekendi aǵyn sý basyp, turǵyndar ábigerge tústi. Qýanyshqa oraı, qaza tapqandar joq, jaýapty mamandar jantalasa jurtty qaýipsiz jerge kóshirdi. Jedel shtab quryp, oblys ákimi Beıbit Isabaev arnaıy jıyn ótkizdi. Qazir, tabıǵı apat seıilgenimen, jetisýlyqtarǵa áli de saq bolǵan jón.
Beıýaq toqtaýsyz jaýǵan jaýyn alqam-salqam halyqtyń tóbesinen jaı túskendeı áser etti. Jolǵa shyqqan jolaýshylar qaıda bararyn bilmeı, jańbyrdyń basylǵanyn kútkenimen, jaǵdaı ýshyǵyp ketti. Saıdaǵy aýyl kóshelerin sý basyp, úıdiń irgesi laıǵa toldy. Osyǵan baılanysty oblys ákiminiń orynbasary Álibek Jaqanbaevtyń tóraǵalyǵymen jedel shtab qurylyp, qutqarý jumystary júrgizildi.
Oblystyq Tótenshe jaǵdaılar departamentiniń málimetine qaraǵanda, túski saǵat 12:36-da Eskeldi aýdanynyń Eshkiólmes aýylynda aýlalarǵa sý kirgeni týraly qońyraý túsken. Atalǵan aýylda 40 aýlada osyndaı jaǵdaı oryn alǵan. Osyndaı aqparat saǵat 13:54-te Kóksý aýdany Mámbet aýylynan da túsken. Bul aýylda 5 aýlany sý basqany anyqtaldy. Odan bólek «Taldyqorǵan – Úshtóbe» oblystyq mańyzdaǵy avtokólik jolynyń 35-shaqyrymynda nóser jaýynnyń saldarynan eńis aǵyny paıda bolǵany belgili boldy. Sonyń saldarynan tıýbıng ótkeli jolǵa quıylǵan bıiktigi 10-15 sm jaýyn sýynyń ekpinine shydamaǵan. Jańbyr sýy Qaratal ózeniniń túsirý arnasyna ketedi.
Oblys ákiminiń baspasóz qyzmetiniń málimetinshe, qazir oqıǵa oryn alǵan eldi mekenderde TJD kúshi men quraldary jumyldyrylǵan. Sonyń ishinde arnaıy quraldarmen jaraqtanǵan 103 qutqarýshy men arnaıy tehnıkalar iske kiristi. Oǵan qosa PD, jergilikti atqarýshy organdar, «Qazseldenqorǵaý» mekemesi, 18386 áskerı bólimi, t.b. qurylymdar jumyldyryldy. Qazir oqıǵa oryndarynda ınjenerlik jumystar, ishinara turǵyndardy evakýasııalaý, sý shyǵarý jumystary júrip jatyr.
Eskeldi aýdanynyń Eshkiólmes jáne Abaı aýyldaryndaǵy tótenshe jaǵdaıǵa baılanysty aýlalaryn sý basqan aýyl turǵyndaryn aýdan ákimdigi Jedel shtabtyń sheshimimen Qarabulaq aýylyndaǵy Shestakov atyndaǵy mektepke ornalastyra bastady. Olarǵa sol jerden ystyq tamaq, jatyn oryn uıymdastyrylady. Aýdan ákimdiginiń málimetinshe, qazirgi kezde 19 adam mektepke jaıǵastyryldy. Onyń 10-y eresek adam, 9-y bala.
Eskeldi aýdanynyń ákimdigi Tótenshe jaǵdaı departamentimen birge nóser jaýynnan bolǵan tótenshe jaǵdaıdyń saldaryn joıýǵa bar kúsh pen tehnıkany jumyldyrýda. Sonymen qatar aryq júıelerin tazartý men aýlalardy batpaqtan tazartý jumystaryna Ulttyq gvardııanyń 5514 áskerı bólimi, Qorǵanys mınıstrliginiń 18386 áskerı bólimi tartyldy.
Jedel shtab Jetisý oblysynyń PD-syna tonaýshylyqty boldyrmaý úshin qoǵamdyq tártipti saqtaý mindetti. Eskeldi aýdandyq ákimdigi keltirilgen shyǵyndy esepteý úshin arnaıy komıssııa qurdy, komıssııa shyǵyndy anyqtaý úshin eldi mekenderdiń aýlalaryn aralap júr. Sý basqan turǵyn úılerdiń jaı-kúıin zerdeleýdiń nátıjesinde tótenshe jaǵdaıdyń saldaryn joıý úshin qarjy bólý máselesi qarastyrylady.О́z kezeginde TATEK mekemesi de elektr jelilerin tekserip, eldi mekenderdi elektr júıesine qosý jumystaryn atqarady.
Qaratal aýdanynda nóser jaýyn men qatty jeldiń saldarynan zaqymdanǵan elektr jelisi qalpyna keltirilip, aýdanǵa elektr jaryǵy berildi. Al Eltaı aýyldyq okrýgine qarasty Abaı aýylynyń úzilgen elektr jelisine apattyq brıgada jóndeý júrgizýde. Oblystyq energetıka jáne TÚKSh basqarmasynyń basshysy Áset Qanaǵatovtyń sózine súıensek, Taldyqorǵan – Úshtóbe 110 KV joǵary voltty jelisiniń boıyndaǵy apattyq oryndy kezekshi brıgada saǵat 15.05-te anyqtap, qalpyna keltirý jumystaryn atqarǵannan keıin saǵat 19.05-te Qaratal aýdanyna tutastaı elektr jaryǵy berilgen. «Oǵan deıin biz Qaratal aýdanynyń ómirlik mańyzy bar nysandaryn Kóksý aýdanynyń jelisi arqyly elektrmen ýaqytsha qamtydyq. Qazir aýdanǵa elektr jaryǵy tolyq úzilissiz berildi», dedi Á.Qanaǵatov.
Sonymen qatar «Taldyqorǵan –Úshtóbe» avtojolynyń 35-shaqyrymynda bolǵan elektr jelileriniń úzilýi men baǵanalardyń zaqymdanýy saldarynan jol aralyǵyndaǵy Abaı aýylynyń da jaryǵy sóngen bolatyn. Bul jerde 7 baǵana zaqymdanyp, 13 aralyq úzilgen. Osyǵan baılanysty qazir jóndeý jumystary júrip jatyr.
Jetisý oblysy