Bıyl zańsyz qarý saqtaǵan 390 adam qylmystyq jaýapkershilikke tartyldy. Al 818 azamat ákimshilik jaýapkershilik arqalaǵan. Bul týraly Ishki ister mınıstrligi Ákimshilik polısııa komıteti Qarý aınalymyn baqylaý basqarmasynyń bastyǵy Asylbek Ydyrysov málimdedi.
Azamattardyń zańsyz saqtalǵan qarý-jaraqty erikti túrde tapsyrý tártibi Ishki ister mınıstriniń 2015 jylǵy 27 naýryzdaǵy № 266 buıryǵymen bekitilgen qaǵıdaǵa sáıkes júrgiziledi. Qujat negizinde quqyq buzýshylyq áreketi joq azamat zańsyz saqtalǵan qarý-jaraqty erikti túrde tapsyrsa, qylmystyq jáne ákimshilik jaýapkershilikten bosatylady.
– Qarýdy satyp alý boıynsha jyl saıyn ótkiziletin aksııa Ishki ister mınıstrliginiń qoǵamdyq qaýipsizdikti qamtamasyz etý boıynsha qabyldap jatqan jalǵyz is-shara emes ekenin atap ótken jón. Máselen, turaqty negizde «Qarý», «Quqyqtyq tártip» jáne taǵy da basqa óńirlik jáne respýblıkalyq jedel-aldyn alý is-sharalary júrgiziledi. Olardyń aıasynda zańsyz aınalymnan qarý men oq-dáriler alynady. Osyndaı is-sharalar nátıjesinde 1,3 myńnan asa atys qarýy tárkilendi, – dedi ol.
Jalpy, 2012 jyldan bastap jyl saıyn ótkizilip kele jatqan zańsyz saqtalǵan qarý-jaraqtardy satyp alý aksııasy barysynda sommasy 1,9 mlrd teńge bolatyn 56 myńnan asa atys qarýy jáne 2 mln asa oıyq qarýdyń oq-dárileri erikti túrde tapsyrylǵan. Ári joǵaryda atalǵan buıryqqa sáıkes, óz erkimen ótkizgenderge qarýdyń túrlerine baılanysty ótemaqy tólenedi.
– Qarýdy ótemaqyǵa tapsyrǵany úshin tólenetin tólemder mólsheri olardyń túrine, tehnıkalyq kúı-jaıyna baılanysty ár qarý úshin 34 myńnan 345 myńǵa deıingi aralyqta bolady. Syıaqy kólemin ár oblystyq, qalalyq jáne aýdandyq polısııa organdarynda qurylatyn komıssııalar belgileıdi. Krımınalıst mamannyń qorytyndysy negizinde atys qarýy, oq-dári nemese jarylǵysh zat retinde tanylmaǵan, IIM bazasynda «Tirkelgen qarý» jáne «Krımınaldyq qarý» esebinde turǵan qarý-jaraqtarǵa, qoldan jasalǵan, sondaı-aq tegis uńǵyly, gazdy jáne jaraqat salatyn oq-dárilerge syıaqy tólenbeıdi. 2023 jyly halyqtan zańsyz saqtalǵan qarý-jaraqtardy satyp alý aksııasy 10 sáýirde bastaldy. Aksııany ótkizýge respýblıkalyq bıýdjetten 88 mln teńgeden asa qarajat bólindi. Búginde polısııaǵa erikti túrde jalpy sommasy 84 mln bolatyn 1 181 qarý, 18 myńnan asa oq-dári tapsyryldy. Taldaý kórsetkendeı, qarýdyń eń kóp tapsyrylǵany Túrkistan oblysynda – 187, Jambyl oblysynda – 134, Qyzylorda oblysynda – 94, Abaı, Aqmola, Aqtóbe, Shyǵys Qazaqstan, Qaraǵandy jáne Pavlodar oblystarynda – 60-tan asa, – dedi Asylbek Ydyrysov.
Jalpy, polısııa departamentteri aldyn ala usynǵan málimetterge sáıkes, Astana, Almaty, Shymkent qalalarynda, Aqmola, Aqtóbe, Almaty, Atyraý, Qaraǵandy, Qostanaı, Mańǵystaý, Soltústik Qazaqstan, Jetisý jáne Ulytaý oblystarynda bólingen qarajattyń ıgerilýine baılanysty aksııa toqtatylǵan.