Qoǵamdyq qabyldaý: Máseleler qaraýsyz qalmaıdy

Elimizdiń ár óńiriniń turǵyn­dary ınfraqurylymdy damytýǵa, taza aýyz sýmen qamtamasyz etýge, erekshe qajet­tilikteri bar adamdardy qoldaýǵa qatysty jáne basqa da máselelermen «Amanat» partııasyna júgindi. Máselen, Shyǵys Qazaqstan oblysyndaǵy Altaı qalasynyń 40 myń turǵyny atynan habarlasqan bir top azamat Osınov asýyn aınalyp ótetin jańa jol salý máselesin kóterdi. Bul asýǵa jyl saıyn myńdaǵan týrıst keledi.

«Altaı jáne shekara mańyndaǵy Katonqaraǵaı aýdandarynyń turǵyndary úshin bul joldyń mańyzy zor. Mundaǵy qurylys 2018 jyly bastalǵan edi, biraq keıin toqtap qaldy. Memlekettik orman qorynan jer telimderin berý jumystary keshiktirilýine baılanys­ty joldy jóndeýge qajet materıaldar qymbattap ketti. Sizden joldy jóndeý jumystaryn tezdetýge kómek kórsetýińizdi suraımyz», delingen azamattardyń ujymdyq úndeýinde.

Erlan Qoshanov partııa fılıalyna Indýstrııa jáne ınfraqurylymdyq damý mınıstrligi jáne Shyǵys Qazaqstan oblysynyń ákimdigimen birlese otyryp, jol qurylysyna qajetti barlyq jer telimin berý máselesin tez arada sheshýdi tapsyrdy. Sondaı-aq qajetti qarajatty bólýdi jedeldetý kerek ekenin aıtty.

Al Aqtaý qalasynyń turǵyndary – erli-zaıypty Jalǵas Qýatov pen Aısulý Qurmanǵazıeva kásipkerlikpen aınalysyp, saýda pavılonyn ashýdy josparlap otyr. Ekeýi de ekinshi toptaǵy múgedek sanatynda. «Jumysymyzdy bastaý úshin ruqsat alýǵa járdemdesýińizdi jáne materıaldyq turǵyda kómek kórsetýińizdi suraımyz», dedi Aısulý Qurmanǵazıeva.

Erlan Qoshanov partııanyń óńirlik fılıalyna ótinish berýshilerge barynsha kómek kórsetýdi tapsyrdy. Májilis tóraǵasy erekshe qajettilikteri bar adamdardy jan-jaqty qoldaý – «Amanat» partııasynyń basymdyqtarynyń biri ekenin atap ótti.

Sondaı-aq Aqmola oblysy Shor­tandy kentiniń 8 myńnan astam turǵyny aýyz sý tapshylyǵyn ótkir sezinip otyr. Máseleniń sheshimin izdegen Serik­bol Mereı partııa tóraǵasymen kezdesýge keldi. «Qoldanystaǵy jeti uńǵyma­nyń tek tórteýi jumys istep tur, qalǵan­darynda sý qory taýsylǵan. Ásirese jaz mezgilinde egistikterdi sýarýǵa jáne tehnıkalyq qajettilikterge kóp mólsherde paıdalanylǵandyqtan sý tapshylyǵy aıtarlyqtaı seziledi», dedi ol.

Erlan Qoshanov bul máseleni sheshý úshin qazirgi ýaqytta toptyq sý qubyryn tartý jobasy ázirlengenin aıtty. Jumys kólemi men ony oryndaýshylar belgili boldy. «Amanat» partııasynyń Májilistegi fraksııasy sý qubyry jelilerin qaıta jóndeýge respýblıkalyq bıýdjetten jaqyn arada tıisti qarajat bólýdi óz baqylaýyna alady.

Al elorda turǵyny, 11 balanyń anasy Nurgúl Qadyrbaeva eki uly Arman men Anas fýtboldan Qazaqstan men TMD elderinde ótken chempıonattarda joǵary sheberlik kórsetkenin atap ótti. Sóıtip, olar Portýgalııadaǵy «Bsports» jastar klýbyna óner kórsetýge shaqyrtý alǵan. Biraq qarjylyq jaǵdaıdyń qıyndyǵyna baılanysty bara almaı otyr.

Partııa tóraǵasy batyr anaǵa jas fýtbolshylar úshin qajetti kómek kór­setiletinin aıtty. Bul máselege Astana ákim­digi men Mádenıet jáne sport mı­nıstrligi de atsalysady. Erlan Qo­shanov qaralǵan barlyq ótinish boıynsha par­­tııa fılıaldaryna naqty tapsyrma­lar berip, olardyń sheshilýin jeke baqylaýyna aldy.