Premer-mınıstrdiń birinshi orynbasary Roman Sklıar jumys saparymen Ulytaý oblysynda boldy. Ol qysqy jylý berý maýsymyna ázirliktiń jaı-kúıin pysyqtap, oblys ortalyǵyn taza sýmen qamtamasyz etýge baılanysty atqarylyp jatqan jumystarmen tanysty.
«Jezqazǵan – Qyzylorda» tasjolyna baılanysty másele de nazardan tys qalmady. Úkimet basshysynyń birinshi orynbasarynyń sapary naq osy jolǵa qatysty «Qazavtojol» basshylyǵynyń baıandamasyn tyńdaýdan bastaldy. R.Sklıar bul baǵyttaǵy jumysty jedeldetýdi tapsyrdy.
Aldaǵy jylý berý maýsymyna tyńǵylyqty daıyndalmasa bolmaıdy. О́tken jyly oblys ortalyǵyndaǵy jylý-elektr ortalyǵynda birneshe márte kúrdeli ahýal qalyptasqan edi. Tipti bıylǵy jazdyń ózinde bul ortalyqtyń qyzmetinen jiberilgen kemshilik turǵyndardy áýrege túsirgen edi. Sondyqtan ótkenniń olqylyǵyn ornyna keltirmese jaǵdaı qıyndap ketýi ábden múmkin. Jezqazǵan qalasyndaǵy jylý qubyrlarynyń 70 paıyzynyń tozyǵy jetken. Qazir qubyrlardy jańartý jumystary júrip jatyr. Bul maqsatqa 3 mlrd teńge bólingen. Jumys bıyl aıaqtalýǵa tıis.
Jylý-elektr ortalyǵynda da jóndeý jumystaryn júrgizýge 5 mlrd teńge qarastyrylǵan. Aldaǵy qysta 5 qazandyq jumys isteıdi dep josparlanǵan. Ázirge josparlanǵan jumystyń 60 paıyzy ǵana atqarylǵan. Bul – aıtarlyqtaı jaqsy kórsetkish emes. О́ıtkeni qys qyr astyna kelip qaldy. R.Sklıar jyl sońyna deıin №4 jáne 9 qazandyq agregattaryn kúrdeli jóndeýdi, №7 qazandyq agregatyn aǵymdaǵy jóndeýdi, sondaı-aq №8 jáne 10 qazandyq agregattaryn jańǵyrtý jóninde tapsyrma berdi.
Jylý-elektr ortalyǵynyń basshylyǵyna «Investısııa ornyna tarıf» baǵdarlamasy aıasynda №10 qazandyqty salý máselesin sheshý tapsyryldy. Sondaı-aq aldaǵy jylytý maýsymynyń sapaly ótýi úshin jóndeý naýqanyn júrgizýdiń mańyzdylyǵy atalyp ótti.
– Biz óz tarapymyzdan oblysqa qajetti qarjylyq qoldaý jasadyq. Bólingen qarjy tıimdiligin kórsetýi kerek. Sizderdiń esepteýlerińiz boıynsha tarıfti (jylý jelisin jáne generasııalaıtyn kózderdi) ulǵaıtý turǵysynan usynystaryńyzǵa da qoldaý kórsettik. Jylý jelilerin de qoldaımyz. Jaǵdaıdy jaqsartý, tozýdy azaıtý, senimdilikti arttyrý úshin ınvestısııalar tartylýy kerek. Jumysty shırata túsken durys. Eń bastysy, halqymyz qystan qysylmaı shyǵýǵa tıis, – dedi R.Sklıar.
Talap qoıyldy, al onyń oryndalýyn ýaqyt kórsetedi.
Ulytaý oblysy