Túrkistan oblysynyń Sozaq aýdanyna qarasty Sholaqqorǵan aýylynyń turǵyny Gúlnahar Mamılaeva qazaqtyń sándik toqyma qolónerin qolǵa alǵan, dep jazady Egemen.kz.
Bala kezinen toqyma toqýǵa qushtar bolǵan ol atalmysh isti kásibine aınaldyrǵan. Súıikti isine qosymsha, úıde otyrǵan qyz-kelinshekterge óz bilgenin úıretý isin de qolǵa alǵan.
Oblys ákiminiń baspasóz qyzmeti habarlaǵandaı, alǵash kásibin balalarǵa arnalǵan sándi úlgidegi kıimder men oıynshyqtar tigýden bastaǵan kásip ıesi osy kúnderi qosymsha aıaq kıimder toqyp, tabys kózin arttyrýda. Tapsyrysqa oraı úıge arnalǵan tápishkeler jáne balalar men eresekterge arnalǵan túrli aıaq kıim men sómkelerdi de toqyp shyǵady eken.
«Toqymanyń barlyq túrin toqımyn. Bilimimdi jetildirip, sońǵy eki jylda aıaq kıimniń túrlerin toqýdy tabys kózine aınaldyrdym. Endigi maqsatym – túıe jáne qoı júnderin óńdep, zamanaýı tehnıkalardy ıgerý arqyly úlken kásip ashý. Qazirgi kezde toqyma aıaq kıimge suranys artyp jatyr. Sapasy fabrıkadan shyqqan ónimderden artyq bolmasa, kem túspeıdi. Halyqtyń arqasynda tabys taýyp otyrǵandyqtan suranysqa sáıkes barynsha úlgerip, sapasyna asa mán berý arqyly kóptiń kóńilinen shyǵýǵa tyrysamyn», deıdi kásip ıesi.
Aıta ketsek, buǵan deıin birneshe ret oblys ortalyǵynda qolóner mádenıetin qalyptastyrý jáne ishki týrızmdi damytý maqsatynda uıymdastyrylǵan aımaqtyq kórme-baıqaýlarda Gúlnahar Mamılaeva óz ónimderin usynyp, is-sharaǵa jınalǵandardyń qoshemetine bólengen edi.