Saýd Arabııasynyń astanasy – Er-Rııadta aýyr atletıkadan erler men áıelder arasyndaǵy álem chempıonatynyń shymyldyǵy túrildi. Kelesi jyly Parıjde alaýy tutanatyn Olımpııa oıyndarynyń joldamalary taratylatyn jarysta 537 ziltemirshi kúsh synasyp jatyr.
Dúbirli dodada Qazaqstannyń týy astynda 12 sportshy óner kórsetý ústinde. Erler arasynda basty úmit Denıs Ýlanovqa artylyp otyr. 81 kılo salmaqta synǵa túsetin ol 2016 jylǵy Rıo Olımpıadasynda tórtinshi orynǵa taban tiregen edi. Ýaqyt oza Denıstiń basty qarsylasy Gabrıel Synkreıanniń dopıng qoldanǵany anyqtalyp, rýmynııalyq aýyr atlet birneshe jylǵa úlken sporttan shettetildi. Sóıtip, qola medal Ýlanovqa tabys etildi. Odan bólek, Shyǵys Qazaqstan oblysynyń týmasy 2016 jyly Tashkentte Azııa chempıony atanyp, 2017 jyly Taıpeıdegi Dúnıejúzilik ýnıversıadada bas júldeni oljalady.
Denıs Ýlanovtan bólek, jastar arasyndaǵy álem chempıony, birqatar dúbirli dodada jeńis tuǵyryna kóterilgen Aqmolda Saıramkezdiń de múmkindigi joǵary baǵalanyp otyr. Er-Rııadta ol 67 kılo salmaq dárejesinde kúsh synasady. Sondaı-aq Parsy shyǵanaǵynda Ernaz Alpysov (55 kılo), Sergeı Petrovıch (89 kılo), Elaman Seıitqazy (81 kılo), Álisher Seıitqazy jáne Asyljan Bektaı (96 kılo) óner kórsetedi. Al áıelder arasyndaǵy saıysta Aınur Ábdihalyqova (49 kılo), Nadejda Lı men Ekaterına Stolıarenkoǵa (71 kılo), Aınur Nurlybekova (76 kılo) men Aısha Omarovaǵa (81 kılo) úmit artamyz. Dúbirli doda 17 qyrkúıekte aıaqtalady.
Sońǵy úsh álem chempıonatynyń nátıjelerine toqtalsaq, 2020 jyly Pattaııada jeńis tuǵyryna kóterilý baqyty tek Igor Sonǵa buıyrdy. 55 kılo salmaqtaǵy jerlesimiz London Olımpıadasynyń jeńimpazy, Rıo Olımpıadasynyń kúmis júldegeri, bes dúrkin álem chempıony, eki dúrkin Azııa oıyndarynyń jeńimpazy Om Iýn Chholge ese jiberip, kúmis medaldy qanaǵat tutty.
2021 jyly Tashkentte uıymdastyrylǵan jarysta Qazaqstan qurama komandasy músheleri arasynda jalǵyz júldeni Arlı Chonteı ıelendi. 55 kılo salmaq dárejesinde óner kórsetken ol qossaıys qorytyndysy boıynsha 260 (118+142) kılolyq ziltemirdi eńserip, jeńis tuǵyrynyń eń bıik satysyna kóterildi.
2022 jyly Kolýmbııanyń Bogato qalasynda qorjynymyzǵa bir kúmis pen bir qola medal tústi. Nurǵısa Ádiletuly (96 kılo) ekinshi oryndy ıelendi. Onyń kórsetkishi – 383 (174+209) kılo. Qazaqtyń nar tulǵaly uly Bahreınniń alyby Lesman Paredesten ǵana qalyp qoıdy. 73 kılo salmaqtaǵy Alekseı Chýrkın úzdik úshtikti túıindedi. Ol 343 (153+190) kılolyq ziltemirdi tik kóterdi. Jerlesimizdiń aldyn Indonezııanyń qos sańlaǵy – Rahmat Ervın Abdýlla men Rızkı Djýanıansııa orady.
Byltyrǵy álem chempıonatynyń qorytyndysy boıynsha jalpykomandalyq esepte Qytaı quramasy ozdy. Aspanasty eliniń tolaǵaılary 6 altyn, 3 kúmis jáne 3 qolany oljalady. Jarys qojaıyndary ekinshi orynǵa taban tiredi. Kolýmbııalyqtardyń qorjynynda 2 altyn, 2 kúmis jáne 4 qola medal bar. Úshinshi orynda – Taıland. Taı eliniń ókilderi túrli-tústi júldelerdiń árqaısysyn qos-qostan enshiledi.