Keshe «Qazaq gazetteri» seriktestiginde Konstıtýsııalyq reformany talqylaýǵa arnalǵan jıyn ótti. Onda jýyrda jarııalanǵan Ata zań jobasy taqyryp ózegine aınalyp, jýrnalısterdiń aqparatty jetkizýdegi biliktiligi, jaýapkershiligi sóz boldy.
Seriktestiktiń bas dırektory, akademık Dıhan Qamzabekuly Konstıtýsııamyzdyń jańa jobasy eldiktiń mártebesin kóterip, halqymyzdyń birligin nyǵaıtyp, bolashaǵyn bekemdeýge baǵyttalǵan mańyzdy qujat ekenin tilge tıek etti.
«Ata zań jobasynyń ańdatý – preambýlasynan bastap, memleketimizdiń birtutastyǵy men myzǵymastyǵyn aıshyqtaıtyn mańyzdy sózder jazyldy. Egemendik pen táýelsizdiktiń orny bekemdeldi. Qazaq tili elimizdiń memlekettik tili ekeni aıqyn jazyldy. Osy jobany talqylaǵan komıssııanyń quramyndamyn. Ol jerde tájirıbeli zańgerler men ǵalymdar, túrli salanyń bilikti mamandary tize qosyp eńbek etip, Ata zań jobasyn jan-jaqty saraptap ázirledi», dedi D.Qamzabekuly.
Sondaı-aq bas dırektor áleýmettik jelide ártúrli alypqashpa áńgimelerdi taratyp jatqan jazbalardyń negizsiz ekenin aıtyp, baspasóz osy máseleni parasatty, bilimdi mamandarǵa, el syılaıtyn zııalylarǵa minber bere bilýi kerektigin eske saldy.
«О́zderińiz de joba mátinimen alǵashqylardyń biri bolyp tanystyńyzdar. Onda birtutas halyq, baıyrǵy qazaq jeri, Uly dalanyń myńjyldyq tarıhy, memlekettiń ýnıtarlyq sıpaty men tutastyǵy, «Ádiletti Qazaqstan» ıdeıasy, «Zań men tártip» qaǵıdaty, azamattardyń quqyqtary men bostandyqtary, etnosaralyq jáne konfessııaaralyq kelisim sekildi birligimizdi nyǵaıtyp, bolashaǵymyzdy aıqyndaıtyn tujyrymdamalyq uǵymdar qamtylǵan. Bunyń bári memleketimizdiń zańdyq negizin qalyptastyryp, bekitedi», dedi ol.
Jıynda bas dırektordyń birinshi orynbasary Vıktor Prıanıkov «Qazaq gazetteri» seriktestigine qarasty basylymdar jańa Konstıtýsııa jobasyn halyqqa tanystyrý men nasıhattaý jolynda jumyla eńbek etý kerek ekenin aıtty. «Bul – bizdiń elimizdiń tarıhyndaǵy jańa betburys. Sol arqyly biz damý men órkendeýdiń jańa kezeńine aıaq basamyz. Bul bizdiń bárimizden jaýapkershilik pen azamattyq ustanymdy talap etedi», dedi ol.
Sondaı-aq jıynda seriktestik bas dırektorynyń orynbasary Qambar Ahmet, bas dırektordyń orynbasary – Almaty basylymdarynyń jetekshisi Baǵashar Tursynbaıuly, «Egemen Qazaqstan» gazetiniń bas redaktory Ǵabıt Iskenderuly, «Kazahstanskaıa pravda» gazetiniń bas redaktory Sábıt Maldybaev sóz alyp, Konstıtýsııalyq reformanyń el ómirine ákeletin ózgeristeri jaıynda oılaryn ortaǵa saldy.
Bas qosýǵa onlaın júıesinde Almaty basylymdarynyń qyzmetkerleri, óńirlerdegi menshikti tilshiler de qatysty.