Shymkentte pedagogterge arnalǵan bos jumys oryndary jármeńkesi ótti. Is-shara aıasynda pedagog mártebesi bar mamandarǵa bos jumys oryndary usynyldy. Sondaı-aq muǵalimderge konkýrsqa qatysýdyń rásimi túsindirilip, qujattardy elektrondy platformaǵa júkteý boıynsha keńes berildi.
Shymkent qalalyq bilim basqarmasy basshysynyń orynbasary Gúlnár Dáribaevanyń aıtýynsha, bos jumys oryndary biryńǵaı «Qarqyn» jobasynyń bir baǵyty «Sana» platformasynyń kómegimen anyqtaldy.
«Bul elektrondy tuǵyrnamany 2025 jyldyń qyrkúıeginen bastap iske asyryp kelemiz. Platforma arqyly synyp qalyptasyp, ár pánnen qansha saǵat bar ekeni belgili bolady. Sol saǵattar keıin muǵalimderge úlestiriledi. Platformamen saǵattardy bólý barysynda kóptegen olqylyq anyqtaldy. Iаǵnı muǵalimder 56 saǵatpen jumys istep kelgen. Tipti 16 saǵattan eki mektepte sabaq bergen. Zań boıynsha muǵalim 1 júktememen ol 16 saǵat nemese ári ketse 1.5 júktememen, ıaǵnı 24 saǵatqa deıin ǵana jumys isteı alady. Osy artyq saǵattardyń bárin jınaqtap, jańa jumys oryndaryn qalyptastyrdyq. Artyq júkteme berip, bos jumys oryndaryn jasyrǵan – mekteptiń birinshi basshylary. Sondyqtan jaýapkershilik tikeleı solardyń moınynda. Osyǵan qatysty prokýratýra keıbir dırektorlarǵa tártiptik jaza qoldanǵan. Al búgingi is-sharaǵa kelsek, ýnıversıtette JPI boıynsha 3,8 balmen bitirgen túlekter konkýrssyz jumysqa qabyldanady», dedi G.Dáribaeva.
Sonymen birge «Sana» baǵdarlamasymen 1166 bos jumys orny anyqtalǵan. Negizinen hımııa, bıologııa, matematıka, bastaýysh synyptarǵa orys tilinde sabaq beretin muǵalimder jetispeıdi. Konkýrstyń ádil, ashyq ótýine bilim basqarmasy kepildik beredi. Búgingi tańda megapolıste 164 memlekettik, 138 jekemenshik mektep jumys isteıdi.
Bul máseleni arnaıy brıfıng barysynda qala ákiminiń orynbasary Sársen Quranbek te aıtqan bolatyn. Onyń málimdeýinshe, pedagogterdi negizsiz jumystan shyǵarý budan keıin oryn almaıdy. Jumystan bosaǵan maman máselesimen tikeleı ózi aınalysatynyna ýáde berdi. Kerisinshe, qala ákimdigi mektep basshylaryna tálimgerlik bastamany qolǵa alýdy júktep otyr. Ol boıynsha mektepter jańadan qabyldanǵan mamandardy bilikti pedagog dárejesine jetkenshe jan-jaqty qoldaý kórsetedi. Sondaı-aq S.Quranbek qala ákimi Ǵabıt Syzdyqbekovtiń uıǵarymymen úzdik 100 muǵalimge grant taǵaıyndalǵanyn jetkizdi. Ol grant «Sapaly bilim» jobasynyń qorytyndysy boıynsha úzdik atanǵan muǵalimderge beriledi. Iаǵnı olardyń jalaqysyna ústeme retinde 200 myń teńge qosylady. Mundaǵy maqsat – bilikti kadrlar arqyly bilim sapasyn jaqsartý. S.Quranbektiń aıtýynsha, Shymkentte sapaly bilim beretin mektepter sany óte az. Tipti onǵa da jetpeıdi. Sondyqtan bilim beretin uıymdardyń da túrli granttar arqyly mártebesin kóterý josparda bar. Sársen Abaıulynyń pikirinshe, qalada muǵalimder kadryna tapshylyq joq. Sebebi megapolıstegi pedagog mamandyǵyn daıarlaıtyn joǵary oqý oryndary, kolledjder suranystyń ornyn toltyryp otyr. Oǵan pedagog bolyp jumys istegen shetten keletin qandastardy qosyńyz. Deı turǵanmen, ol mamandardyń jumysqa tura almaýyna birinshi kezekte bos jumys oryndary konkýrsyn der kezinde ótkizbegen mektep basshylyǵy kináli deıdi. Onyń ústine jyl saıyn qala ákimi óz tarapynan joǵary oqý oryndaryna 285 grant bóledi. Búginge deıin birde-bir mektepten ózderine qajetti mamandarǵa grant bólý týraly usynys kelip túspegen. S.Quranbek óz sózinde jas pedagogterdi kóbirek jumysqa tartý kerektigin atap ótti. О́ıtkeni onyń oıynsha jańa tehnologııany jyldam meńgeretin jas kadrlar bilim salasynda ózara básekelestik týǵyzyp, ustazdar tájirıbesiniń artýyna úles qospaq. Sonymen birge ol megapolıste naqty qansha muǵalim mamandyǵyna tapshylyq baryn bos jumys oryndary jármeńkesinen keıin belgili bolatynyn málimdedi.
ShYMKENT