Búgin fýtboldan Qazaqstannyń ulttyq quramasy Eýropa chempıonatyna irikteý týry aıasyndaǵy kezekti matchyn ótkizip, «Astana Arena» stadıonynda Soltústik Irlandııa fýtbolshylaryna qarsy oınaıdy. Tartys aldynda ótken baspasóz máslıhatynda ulttyq quramanyń bas bapkeri Magomed Adıev jeńiske jetemiz dep ılandyrdy.
«Fınlıandııa fýtbolshylaryna 0:1 esebimen ese jibergen matchtan keıin quramada ózgeris engiziledi. Ár oıynda jibergen qatelikti túzeýge kúsh salamyz. Soltústik Irlandııa quramasyndaǵy oıynshylardyń jaraqaty bar, bizde de beldi fýtbolshylardyń keıbiri densaýlyǵyna baılanysty qatysa almaıdy. Taǵy da aıtam, jeńilisti qabyldaý aýyr, úsh kún buryn Fınlıandııa fýtbolshylarynan utylǵanymyz áli de jegideı jeıdi. Jeńiske alaqaılap qýana alamyz, jeńilisti de kótere alýymyz kerek. Biz syrt alańda Soltústik Irlandııa quramasyn 0:1 esebimen utqanbyz, bul joly da jigitter jerge qaratpaıtynyna senemin», dedi bas bapker.
Qazaqstan – Soltústik Irlandııa matchyn «Qazsport» telearnasy 18:50-de tikeleı efırden kórsetedi.