Álemniń tórtinshi raketkasy atanyp otyrǵan Elena Rybakına bıyl WTA-nyń qorytyndy týrnırine qatysý qurmetine ıe boldy. Buryn-sońdy jekelegen saıysta baq synap júrgen birde-bir jerlesimizge ondaı baq buıyrmaǵan edi.
Árıne, Elenaǵa ondaı qurmettiń tegin kórsetilip otyrmaǵany anyq. Sońǵy jyldary 24 jastaǵy jerlesimiz óreli ónerimen kózge túsip, tolaıym tabystarǵa qol jetkizip júr. 2021 jyly ol Rolan Garrostyń shırek fınalyna deıin jetse, 2022 jyly Ýımbldonda qarsylas shydatpaı, bas júldeni oljalady. Bıyl Aýstralııanyń ashyq birinshiliginiń aqtyq synyna deıin alqynbaı jetti. Buǵan qosa WTA týrnırlerin bes márte utyp, ITF dodalarynda tórt ret daralandy. Bir ǵajaby, bıylǵy maýsymda Rybakına álemniń 1-raketkasy polshalyq Iga Sventektiń ózin úsh ret utty. Bul kúnderi qorjynynda 5 476 upaıy bar Qazaqstannyń ókili álemdik reıtıngte tórtinshi orynda tur. Jer-jahannyń eń tańdaýly segiz tennısshisiniń basyn qosatyn báseke 29 qazan men 5 qarasha aralyǵynda Meksıkanyń Kankýn qalasynda ótedi. Onyń júlde qory shamamen 5 mıllıon AQSh dollaryn quraıdy.
WTA-nyń áıelder arasyndaǵy qorytyndy týrnıri 1972 jyldan beri uıymdastyrylyp keledi. Sol aralyqta eń kóp oljaǵa kenelgen – Martına Navratılova. Chehoslovakııada týyp-ósip, keıinnen AQSh-qa qonys aýdarǵan áıgili tennısshi ótken ǵasyrdyń jetpisinshi jáne sekseninshi jyldary segiz birdeı týrnırde (1978-1979, 1981, 1983-1986 jyldary) teńdessiz dep tanyldy. Germanııalyq Shteffı Graff (1987, 1989, 1993, 1995-1996) pen amerıkalyq Serena Ýılıams (2001, 2009, 2012-2014) bes retten top jardy. AQSh-tyń taǵy bir ókili Krıs Evert (1972, 1973, 1975, 1977) tórt jarysta ozdy. Atalǵan týrnırdiń tuńǵysh jeńimpazy da dál osy sportshy.
Erler arasyndaǵy rekordtyq kórsetkish Rodjer Federer men Novak Djokovıchke tıesili. Ekeýi alty retten bas júldeni oljalady. Shveısarııanyń maqtanyshy 2003-2004, 2006-2007, 2010-2011 jyldary qarsylas shaq keltirmese, Serbııanyń sańlaǵy 2008, 2012-2015, 2022 jyldary shashasyna shań juqtyrmady. Chehoslovakııalyq Ivan Lendl (1981-1982, 1985-1987) men amerıkalyq Pıt Samprastyń (1991, 1994, 1996-1997, 1999) bes týrnırde mereıi ústem boldy.