Qazaqstanda 2023-2025 jyldarǵa arnalǵan keshendi jospar aıasynda balalardy zorlyq-zombylyqtan qorǵaý, sýısıdtiń aldyn alý, olardyń quqyqtary men salamattylyǵyn qamtamasyz etý boıynsha jańa sharalar júzege asyrylady. QR Premer-mınıstri Álıhan Smaıylov tıisti qaýlyǵa qol qoıdy, dep habarlaıdy Egemen.kz Úkimettiń baspasóz qyzmetine silteme jasap.
Qujat Memleket basshysynyń 2022 jyldyń jazynda ótken Úkimettiń keńeıtilgen otyrysynda bergen tapsyrmasyn oryndaý maqsatynda ázirlendi. Onyń sheńberinde oblystar, aýdandar jáne qalalar boıynsha táýekelderdiń ınteraktıvti kartasy jasalady, onda balalar arasyndaǵy quqyq buzýshylyqtar, zorlyq-zombylyq jáne qorlaý faktileri, sabaqqa kelmeý týraly ózekti aqparat kórsetiledi. Bul «daǵdarysty basqarý» ádisin qoldana otyryp, sapaly monıtorıng júrgizýge jáne shuǵyl kómek kórsetýge kómektesedi.
Sonymen qatar Fınlıandııa tájirıbesi negizinde bilim berý uıymdary úshin onlaın saýalnamalar, taqyryptyq sabaqtar, áńgimelesý jáne sabaqtan tys is-sharalar ótkizýdi kózdeıtin býllıngke qarsy baǵdarlama ázirleý josparlanyp otyr. Sondaı-aq zorlyq-zombylyqqa, qorqytýǵa ne kıberbýllıngke ushyraǵan nemese kýá bolǵan kámeletke tolmaǵandardy erte anyqtaý jáne olarǵa kómek kórsetý ádistemesi bekitiledi.
Budan basqa, keıs-menedjment tetigin qoldaný arqyly mektepishilik esepke alýdy júrgizý tásilderi ózgertiledi. Bul daǵdarys jaǵdaıyn anyqtaýdan bastap jeke jumys josparyn qurý jáne jaýapty muǵalimderdi bekitý arqyly máseleni tolyǵymen sheshýge deıingi sharalardy qabyldaýdy qamtıdy.
Qujatty júzege asyrý aıasynda balalarǵa arnalǵan BalaQorgau biryńǵaı baılanys ortalyǵyn qurý, mektepke deıingi, orta, kásiptik jáne tehnıkalyq bilim berý uıymdarynda jeke qaýipsizdik sabaqtaryn engizý, sondaı-aq balalarǵa arnalǵan qaýipsiz kontentti qalyptastyrý úshin elimizdegi TikTok, Instagram, Facebook, Vkontakte jáne YouTube platformalarynyń ókilderimen jumys júrgizý josparlanyp otyr.
Sonymen qatar Keshendi josparda turmysy tómen otbasylarǵa kómek kórsetý, aımaqtyq psıhologııalyq qoldaý ortalyqtaryn qurý, pedagog-psıhologter men áleýmettik pedagogterdiń sanyn kóbeıtý, pedagog-psıhologterdiń synyppen qosymsha jumys ýaqytyn engizý jáne jalpy olardyń jumysyn sıfrlandyrý boıynsha sharalar qarastyrylǵan.
Oǵan qosa ata-ana men bala arasyndaǵy qarym-qatynasty nyǵaıtý, mádenı tárbıe berý jáne balalar men jasóspirimderdiń shyǵarmashylyq áleýetin júzege asyrý, balalar sportyn damytý jáne kámeletke tolmaǵandardy qosymsha bilimmen keńinen qamtý sharalary qabyldanady.
Keshendi jospardy iske asyrý nátıjesinde kámeletke tolmaǵandar arasyndaǵy jáne olarǵa qatysty quqyq buzýshylyqtar, sondaı-aq ózine qol jumsaý faktileri men áreketteri aıtarlyqtaı tómendeıdi dep kútiledi. Bul rette balalardy qorǵaý jáne olardyń bos ýaqytyn qamtý deńgeıi artady.
Jospardy iske asyrý barysynda Qazaqstanda qosymsha 1000 pedagog-psıholog pen 2000 áleýmettik pedagog daıarlanady. Sonymen qatar balalardyń quqyqtaryn qorǵaý salasynda jumys isteıtin, biliktiligin arttyrý sharalarymen qamtylǵan pedagogterdiń úlesi jyl saıyn 33%-ǵa artady.