Premer-mınıstr Álıhan Smaıylovtyń tóraǵalyǵymen ótken Ekonomıkany demonopolızasııalaý jónindegi komıssııanyń otyrysynda respýblıkanyń birqatar jylý-elektr ortalyǵynyń (JEO) qyzmetin tekserý qorytyndysy qaraldy.
Prokýratýra organdary 11 jekemenshik JEO-da jylý-energetıka jáne tabıǵı monopolııalar salasyndaǵy zańnamanyń saqtalýyna tekserý júrgizdi. Tekserý barysynda keıbir nysanda júıeli kemshilikter men zań buzýshylyqtar anyqtaldy. Qaı stansada da qondyrǵylardyń ábden tozyǵy jetken, bul jaǵdaı jylý berý maýsymynda apattarǵa ákelýi múmkin.
Talqylaý qorytyndysy boıynsha ýákiletti organdarǵa stansalarda kúrdeli jóndeý men modernızasııalaýdy qamtamasyz etý boıynsha menshik ıelerimen jumys isteý tapsyryldy. Úkimet basshysy 2023-2024 jyldarǵa arnalǵan naqty jumys kestesin belgilep, onyń oryndalýyn baqylaýdy talap etti. Mindettemeler buzylǵan jaǵdaıda stansalardy memleket menshigine qaıtarý sharalary qabyldanady.
Sondaı-aq komıssııa otyrysynda elimizdiń iri ónerkásip kásiporyndaryn gazben qamtamasyz etý salasyndaǵy tıimsiz monopolıst deldaldardy joıý máselesi de talqylandy. Tıisti ınfraqurylymy bar bul kompanııalardaǵy memlekettik úlester kezinde arzandatylǵan baǵamen jeke qolǵa ótken. Nátıjesinde, bul gaz tasymaldaý naryǵynyń monopolııalanýyna jáne qyzmet kórsetý tarıfteriniń kóterilýine alyp keldi.
Álıhan Smaıylov ýákiletti vedomstvolarǵa osy aktıvterdi Qazaqstan zańnamasynyń talaptaryna saı memleket menshigine qaıtarý máselesin jedel pysyqtaýdy tapsyrdy.