Irimshik daıyndaý tek aspazdyq nemese kásiptik emes, iri deńgeıdegi saıystardyń da ózegi bolyp keledi. Gazetimizde buryn Mańǵystaý oblysynyń Túpqaraǵan aýdany aýmaǵynda ornalasqan «Jeti laq» fermasy Fransııada ótetin «Mondial du fromage – 2023» halyqaralyq irimshik jáne sút ónimderi baıqaýyna joldama alǵanyn habarlaǵan edik. Budan úsh jyl buryn óz kásibin bastap, búginde pasterlengen eshki sútin, ıogýrt, aıran, súzbe, qaımaq jáne irimshiktiń 12 túrin shyǵaryp, aıyna 3,5 tonna eshki sútin óndiretin ferma ıeleri Nıkıta Kobzev pen Aleksandra Grıgolovanyń Fransııadaǵy saıystan qorjyny qur qaıtqan joq.
Irimshik óndirýshiler arasynda mańyzdy sanalatyn «Mondial du fromage – 2023» baıqaýynda bıyl 250 tóreshi álemniń ár túkpirinde ázirlengen irimshiktiń 1 600 túri arasyna 150 irimshikti iriktep aldy. Olardyń arasynda Mańǵystaýdan barǵan Aleksandra men Nıkıtanyń «Jeti laq» fermasynyń óz óndirisindegi eshki men túıe sútinen daıyndalǵan irimshiktiń eki túri bar. «Jeti laq» fermasy bul baıqaýǵa Qazaqstan boıynsha ári tuńǵysh qatysýshy, ári tuńǵysh júldeger boldy. Nıkıta men Aleksandra «Mondial du fromage – 2023» baıqaýynda kúmis jáne qola júldege ıe bolyp, halyqaralyq irimshik jasaýshylar gıldııasyna qabyldandy.
– Qazaqstan tarıhynda tuńǵysh ret bizdiń óndirýshiler álemdik úzdik irimshik jasaýshylarmen konkýrsqa qatysyp, otandyq ónimderdi usyndy. Bizdiń maqsatymyz – irimshik mádenıeti men irimshik jasaý sheberligin damytý. Biz baıqaýǵa alty aıdan asa ýaqyt daıyndaldyq. Joǵary jetistikke jetkenimizge óte qýanyshtymyz jáne maqtan tutamyz. Bizdi halyqaralyq irimshik jasaýshylar gıldııasyna saltanatty túrde qabyldady, bul – irimshik áleminiń elıtasy. Biz – Qazaqstannyń osy ataqqa ıe bolǵan alǵashqy irimshik jasaýshylarymyz. Mańǵystaý oblysynyń ákimi Nurlan Noǵaevqa jáne Mańǵystaý oblysynyń kásipkerler palatasyna jan-jaqty qoldaý kórsetkeni úshin erekshe alǵys bildirgimiz keledi, – dedi A.Grıgolova.
10 gektar jerge jemshóp qoımasy men sút óńdeý sehyn salyp, eshki ósirýmen aınalysatyn «Jeti laq» fermasy jańa shabytpen óz kásibin jalǵastyrady.
Mańǵystaý oblysy