Mádenıet jáne aqparat mınıstrliginiń bastamasymen júzege asyrylǵan «Kieli tabigat» aksııasyna aqtóbelik jastar belsendi qatysty.
Senbi kúni aýyl jáne qala jastary týǵan ólkedegi kıeli oryndardy retke keltirdi. Máselen, Muǵaljar aýdanynyń Juryn aýyldyq okrýgi turǵyndary Muǵaljar qyrattaryndaǵy Estemes taýy baýraıyn qoqystardan tazartty. Olar jaz boıy tabıǵat aıasynda demalýshylar beı-bereket tastap ketken qoqystar men plastık qutylardy jınastyrdy. Shalqar aýdany Kishiqum jáne Toǵyz aýyldyq okrýginiń jastary kóshe boıyn, aýyldaǵy saıabaqty qalpyna keltirdi.
Aqtóbe oblystyq jastar resýrstyq ortalyǵy bastamasymen 100-den astam erikti Baıǵanın aýdanyndaǵy Jarqamys aýylynan 37 shaqyrym jerdegi HVIII ǵasyrdyń eskertkishi – Dáýimshar qorymynda tazalyq jumystaryn júrgizdi. Jem ózeniniń sol jaǵalaýynda ornalasqan, respýblıkalyq mańyzy bar tarıhı-mádenı eskertkishter tizimine engen qorymda 200-den asa kesene, saǵana tam, qoıtas bar. Aqtóbeden barǵan «Jasyl el» jasaǵynyń eriktilerine Baıǵanın aýdanynyń jastary qosylyp, qorym arasyn qýraǵan shópterden tazartyp, eski súrleý jolyn ashty, boıaýy óshken eskertkishterdi jýyp-tazalap, úsh ǵasyr burynǵy tas obalardyń shashylǵan tastaryn jınady. «Aksııaǵa qatysqan jastar týǵan jerdiń tabıǵatyn syılaý ótken murany qadirleýden bastalatynyn jaqsy sezinedi», deıdi oblystyq ishki saıasat basqarmasynyń bólim basshysy Eleýsiz Nurǵalıev.
Aqtóbe oblysy