Qyrkúıektiń 13-17 aralyǵynda elordanyń 25 jyldyǵyna oraı, Astana qalasy ákimdiginiń qoldaýymen «Silk Way Creative Games» XIV Ulttyq delfıı oıyndary ótti. Oǵan fortepıano, skrıpka, akademııalyq án, halyq aspaptary, halyq áni, estradalyq án, halyq bıi, zamanaýı bı, fotografııa, kıim dızaıny, kórkem oqý, teatr óneri, beıneleý óneri, sándik-qoldanbaly óner, ym-ıshara tilinde án aıtý syndy barlyǵy 15 atalym boıynsha 10-25 jas aralyǵynda 500-den astam ónerpaz qatysty. Bul 500 ónerpazdyń árqaısy 30 sáýir men 5 qyrkúıek aralyǵynda elimizdiń 17 oblysynda Ulttyq delfıı komıteti ótkizgen óńirlik irikteý týrlarynyń úzdikteri.
Ulttyq delfıı komıteti oıyndardy ótkizý, elimizdiń jas talanttarynyń kásibı damýyn qoldaýmen ǵana shektelmeı, qoǵamnyń qalyptasýyn saralap, el aýmaǵyndaǵy jańa mádenı trendterdi taldap, nasıhattaýmen aınalysady. Bıyl Ulttyq delfıı oıyndarynyń aıasynda komıtet uly Abaıdyń Jıyrma segizinshi qara sóziniń negizinde Astanadan, elimizdiń alys-jaqyn óńirlerinen jáne birqatar ózge memleketterden kelgen sarapshylardy pikir almasý alańyna shaqyryp, «Adal azamat. Frankenshteın nemese bolashaqqa nyq qadam ba?» strategııalyq sessııasyn uıymdastyrǵany sonyń aıǵaǵy.
Ulttyq oıyndar aıasynda Qazaqstan halqy assambleıasynyń Dostyq úıinde ótken kezdesýge mádenıet, qoǵam qaıratkerleri, Halyqaralyq delfıı komıtetiniń músheleri men qazylar alqasy, Ystanbul konservatorııasy ókilderi, Parlament depýtattary qatysty. Atalǵan strategııalyq sessııasynyń negizgi mindeti – qazirgi qoǵamda Prezıdent Joldaýynda eskerilgen adal azamat qalyptastyrý úshin ne isteý kerektigi týraly birlesken usynystar ázirleý. Munda qoǵamdyq qundylyqtarǵa ıek arta otyryp, adal azamat qalyptastyrý tóńireginde birqatar pikirler ortaǵa tastaldy. «Qoǵamdyq damýǵa yqpal etip, atalǵan úderisti jedeldetýge, joǵary mádenıetti damyǵan qoǵam qalyptastyrýǵa árbir azamat jaýapty. Biraq naqty baǵyt-baǵdar men tujyrymdy kózqarasqa bastaıtyn qadamdar bolýy kerek emes pe?», degen naqty sheshimderge jeteleıtin usynys aıtyldy. Sondaı-aq bul sessııa – ár adam kózqarasyn kópshilik qaýym arasyna tastap, pikirles adamdardyń ortaq kózqarasyna aınaldyra alatyn aýqymdy joba degendi aıtady uıymdastyrýshylar.
Sonymen, 15-16 qyrkúıek kúnderi elimizdiń barlyq óńirinen jınalǵan daryndy jastar Ulttyq delfıı oıyndary qazylarynyń aldynda Astananyń ár jerindegi mádenı oryndarda óner kórsetip, baqtaryn synap jatty. Atap aıtqanda «Fortepıano», «Skrıpka», «Akademııalyq án aıtý», «Beıneleý óneri», «Sándik-qoldanbaly óner», «Fotografııa», «Kıim dızaıny» atalymdary E.Rahmadıev atyndaǵy memlekettik akademııalyq fılarmonııa konsert zaly men foıesinde; «Halyq aspaptary», «Halyq áni», «Halyq bıi», «Zamanaýı bı» atalymdary Ál-Farabı atyndaǵy oqýshylar saraıynyń basty, kishi sahnalarynda; «Teatr», «Kórkemsóz oqý», «Fotografııa» atalymy M.О́temisuly atyndaǵy oqýshylar saraıynda; «Ym-ıshara tilinde án aıtý», «Estradalyq án» atalymy «Jastar» saraıynda ótti. Ár atalym boıynsha úzdik shyqqan ónerpazdar 16 qyrkúıek kúni keshkisin Rahmadıev atyndaǵy memlekettik akademııalyq fılarmonııanyń «Astana» konsert zalynda «Silk Way Creative Games» XIV Ulttyq delfıı oıyndary jeńimpazdarynyń Gala-konsertinde kópshilikke ónerlerin kórsetti. Bulardyń árqaısysy aldaǵy ýaqytta Qyrǵyz Respýblıkasynda ótetin Halyqaralyq delfıı oıyndary olımpıadasynyń bıik shyńyn baǵyndyrýǵa attanady. Olardyń qatarynda ulttyq aspaptar boıynsha dombyradan atyraýlyq Oralbek Abylaıhan (10-15 jas) men Alıdan Jadenov (16-21 jas), 10-15 jasta qobyzdan qaraǵandylyq Serikbaı Raýan, atyraýlyq Dana Otar (16-21 jas), syrnaıdan 16-21 jas aralyǵynda astanalyq Rýslan Galkeev, halyq ánin oryndaýdan 10-15 jas aralyǵynda atyraýlyq Aısana Ilııasqyzy, 16-21 jasta astanalyq Dıdar Shýnaev, al halyq ánin ansamblmen oryndaýdan astanalyq «Nazqońyr» dástúrli ánshiler ansambli bar. Sondaı-aq fortepıanodan qaraǵandylyq Aleksandr Volokıtın (10-15 jas) men almatylyq Ashot Mhıtarıan birinshi orynnan kórindi.
Skrıpkadan Ánel Danııar (10-15 jas) men Dılnaz Jankýshýkova (16-21 jas) ozyp keldi.
Halyq bıinen 10-15 jas arasynda almatylyq «Gami» bı mektebi, 16-21 jasta «Saltanat ansambli jeńimpaz tanyldy.
Zamanaýı bıleýden báıgeni 10-15 jas aralyǵy boıynsha taǵy da sol almatylyq «Gami» bı mektebi, 16-21 jasta Aqmola oblysynan kelgen horeografııalyq «Polyanka» ujymy ıelendi.
Estradalyq án oryndaýda 10-15 jas aralyǵynda astanalyq Ádil Kúnedilov, 16-21 jasta aqmolalyq Altynaı Áıten qara úzdi.
Ymdap án salýdan 10-15 jas aralyǵynda qyzylordalyq Jańagúl Qadyr, 16-21 jasta qaraǵandylyq Ernur Sámen top jardy.
Akademııalyq ánnen 16-21 jas arasynda qaraǵandylyq Jaına Juma, 22-25 jasta astanalyq Qadyrbek Qaldar úzdik shyqty.
Dekoratıvti qoldanbaly ónerde 10-15 jas arasynda jambyldyq Arýjan Jomartbek, pavlodarlyq Olga Panafıdına (16-21 jas) jeńiske jetti.
Teatr óneri boıynsha 14-21 jas aralyǵynda aqmolalyq «Infinity laboratory» jeńimpaz boldy.
Kórkemsóz oqýdan pavlodarlyq Aınara Dosymjanova (16-21 jas) jeke keldi.
Beıneleý ónerinen 10-15 jas aralyǵynda pavlodarlyq Anastasııa Zelenkevıch, tarazdyq Nurbol Ospan (16-21 jas) ozyq kórindi. Atalǵan jeńimpazdar halyqaralyq dodada el namysyn qorǵaıdy.