Úmit pen kúdikke toly kún

Alǵashqy kúnniń nátıjesi

Aldymen burnaǵy kúni ótken jarystyń keshki sessııasyn­da­ǵy sportshylarymyzdyń nátı­jesine toqtalaıyq. Burnaǵy kúni dzıýdoshylarymyz Abıba Ábýjaqynova (48 kılo) – kú­mis, Maǵjan Shamshadın (60 kılo) qola medal jeńip al­ǵa­nyn jazǵan edik. Sondaı-aq qa­zirgi bessaıysshylar Ele­na Potapenko men Georgıı Bo­ro­­da-Dýdochkın jekeleı ja­rys qorytyndysy boıynsha olım­­pıadalyq lısenzııa ıelendi.

Qalǵan sportshylardyń ná­tıjeleri de jaman emes. My­saly, sporttyq gımnastıkadan Narıman Qurbanov «at ústinde jattyǵý» boıynsha fınalǵa shyqty. Al bokstan 63,5 kılo­ǵa deıingi salmaq dárejesinde Ertýǵan Zeınollınov jarystyń 1/16 fınalyna ótti.

Shahmattan Jansaıa Ábdi­málik qarsylasynan basym tús­se, Bıbisara Asaýbaeva teń tar­qasty. Erler arasynda Qazybek Nógerbektiń esebinde eki jeńis, Rınat Jumabaevtyń enshisinde bir jeńis bar.

Gandboldan áıelder qura­masy toptyq kezeńde Taıland quramasyn 44:20 esebimen ut­ty. Tennısten Beıbit Juqaev jekeleı saıystyń ekinshi raýn­dynda Tájikstan sportshy­sy Fırýz Mýhıdınovty jeńdi. 6:0, 6:0. Jaǵajaı voleıbo­ly­­nan synǵa túsip jatqan N.Aldash­­ /K.Gýrın jáne S.Bogatý/D.Iаkov­lev juptary erler arasynda shı­rek fınalǵa ótti.

Jubanysh beldeýinde jeńilis tapty

Jarystyń ekinshi kúninde altyn medaldan úmitsiz emes edik. Sebebi bul kúni altyn alýǵa laıyqty dzıýdoshylarymyz Ǵusman Qyrǵyzbaev (66 kg), Danııar Shamshaev (73 kg), Abylaıhan Jubanazar (81 kg) sekildi Azııa chempıony men Úlken dýlyǵa jarysynda júlde alyp júrgender tatamıge shyǵatyn edi. Sodan bolar Hanchjoýǵa kelgen otandyq jýrnalısterdiń teń jartysy dzıýdo ótetin sport arenasyna at basyn burdy. Alaıda bul kúni sportshylardyń nátıjesi jankúıerler kútkendeı bolmady.

73 kılo salmaqta synǵa tús­ken dzıýdoshymyz Danııar Sham­shaev birinshi aınalymda gon­kongtik balýannan basym túsip, jarysty senimdi bas­tady. Biraq ekinshi aınalymda oıda-joqta tájikstandyq Berýzı Hojazodaǵa ese jiber­di. Al jubanysh beldesýinde qyr­ǵyzstandyq balýandy ut­qanymen qola júlde úshin kú­res­te mońǵol balýanyna shamasy jetpedi.

Al Abylaıhan Jubana­zar (81 kg) birinshi aınalymda gonkongtik balýandy, 1/4 fınalda bahreındik qarsylasyn tize búktirip, jartylaı fınal­ǵa joldama alǵanda «Altyn ala­dy-aý» dep úmittendik. Sebebi Abylaıhan bıylǵy Grand-Slam­nyń eki birdeı jarysynda júldegerler qatarynan kó­ringen edi. Biraq jartylaı fınalda bizdiń jigitke qar­sy­las atanǵan tájik Somon Mah­mad­bekov te ákki balýan eken. Ekeýara myqtyny anyqtarda qarsylastyń mereıi ústem boldy. Fınalǵa joldama alǵan tájik dzıýdoshysy altyn medal alsa, qola júlde úshin kú­resken A.Jubanazar ózbek dzıý­doshysy Mýsa Sobırovqa esh múmkindik bermeı «ıppon» ádisimen jeńiske jetti.

Bul keshte taǵy bir táji­rıbeli dzıýdoshymyz Ǵus­man Qyrǵyzbaev tatımege shyq­ty. Alaıda Azııa oıyndaryn­da júldege ilikken joq. Birinshi beldesýinde jeńiske jetken ol shırek fınalda jeńildi. Artynsha jubanysh beldesýin­de de jeńilis tapty. Dzıýdodan Qazaqstan quramasynyń bas bap­keri Nurbol Súleımenov­tiń aıtýynsha, Ǵusman oılanbaı ádis jasaıtyn balýan emes. Biraq muny tóreshiler túsine bermeıdi.

– Ǵusman eshqashan oılanbaı ádis jasamaıdy. Eshqashan aramdyqqa barmaıdy. Biraq Qyrǵyzbaevtyń bul áreketin basqalary jattap alǵan. Sóı­tip, olar ádiske kirip ketedi. Tóreshiler de sylbyr kúresti dep esepteıdi. Jalpy alǵanda, Ǵusman qaıta-qaıta eskertý ala­tyndaı las kúresetin balýan emes, – dedi bapker.

Qazaq-ózbek teketiresi – 2:0

Mırodjan Iýldashevtiń jeńisinen keıin qazaq-ózbek qyzdary tatamıge bettedi. Qola medal úshin bolsa da eki el arasyndaǵy teketires bul joly da jalǵasyn tapty. Onyń ústine qos eldiń jankúıerleri arenada bir jerge ornalasqan eken. Baýyrlas elderdiń jankúıerleri bir jerden kıqýlap óz sportshysyna qoldaý bildirip jatty. BAQ ókilderi ornalasqan jerde de qazaq-ózbek jýrnalısteri «Qalaı bolady eken?» degendeı demderin ishterine tartyp otyrdy.

Áıelder arasynda Esmıgúl Quıylova (63 kg) birinshi aınalymda mońǵolııalyq balýan­­nyń jaýyrynyn jer ıisketip, ke­le­si kezeńge shyqqanymen, ekin­shi kezdesýde koreıalyq ba­lýanǵa ese jiberdi. Al juba­nysh beldesýinde fılıppındik dzıýdoshydan basym boldy. ­Qola júlde úshin kúreste Esmı­gúlge jeńis aýadaı qajet edi. Se­bebi onyń qarsylasy ózbekstan­­dyq Sevenısh Isokova-tuǵyn. Al Esmıgúl – О́zbekstannan kelgen qandasymyz. О́zinen bes jas úlken qarsylasyn «ıppon» ádisimen jeńgen Esmıgúl Azııa oıyndarynyń qola júldegeri atandy. Bul – jerlesimizdiń ázir­ge eń iri jeńisi.

Jarystan keıin Esmıgúl Quıylova eksklıýzıvti suhbat berip, osy jetisikke jetelegen sporttaǵy ápkesi Abıba Ábý­jaqynovaǵa alǵysyn aıtty.

– Men 21 jastamyn. Bir jyldan beri Qazaqstannyń áıelder quramasynda kúresip júrmin. Búgingi qýanyshymdy sózben jetkize almaımyn. Qat­ty qýanyp turmyn. Osy júl­dem­di ata-anama jáne barsha Qazaq eline arnaımyn. Sodan soń me­niń dzıýdodaǵy basty jana­shy­rym Abıba Ábýjaqynovaǵa rahmet aıtamyn. Ol aqyl-keńesin aıaǵan emes. «Jeńesiń, kem degende úshinshi oryn alasyń!», dep únemi jigerlendirip otyrady. О́zim de osy kezdesýge «О́lispeı berispeımin», dep shyq­tym. «Qalaıda jeńemin!», degen oı boldy. Alǵashynda ózimniń qateligimnen qarsylasqa upaı berip qoıdym. «Ippon» beretin shyǵar dep qobaljyp turǵanmyn. Tóreshi tek «vazzarı» dep eseptedi. Sol kezde de munyń maǵan berilgen múm­kindik ekenin túsindim de, barymdy saldym. Aıtarlyqtaı je­ńisterim joq. Elimdi alda talaı je­ńispen qýantarym sózsiz. Ma­ǵan baǵyt-baǵdar bergen, ma­ǵan senim artqan bapkerler­ge myń alǵys. Osy medal iri je­ńisterge jol ashady dep senemin, – deıdi Esmıgúl.

Dál osyndaı múmkindik Se­vara Nyshanbaevada (57 kg) bol­ǵan edi. Ol birinshi aına­lym­da tájikstandyq balýandy jeń­di. Al ekinshi aınalymda taıpeılik áriptesine ese jiberdi. Jubanysh beldesýinde BAÁ balýanyna shamasy kelmedi.

О́zbekstannyń eleýli jetistigi

Ánsheıinde boks bolsyn, kú­res bolsyn, fýtbol bolsyn nátıjemizdi ózbektermen salystyratynymyz bar edi ǵoı. Osy joly da Azııa oıyndarynda ózara jarysyp jatyrmyz. Alashapandy aǵaıyndardyń «О́zbekstan 24» telekanaly­nyń jýrnalısi Norbek Nııazov­ty sózge tartqanymyzda, Azııa ­oıyndaryna bas-aıaǵy 350 sportshy, sportshylardyń jetis­ti­gin nasıhattaý úshin 35 jýrnalıst kelgenin maqtanyshpen aıtty.

Hosh, 73 kılo salmaqta tatamıge shyqqan ózbek Mırod­jan Iýldashev qarsylastarynyń barlyǵyn qoǵadaı japyryp fınalǵa súrinbeı shyqqanyn óz kózimizben kórdik. Al fınal­da dzıýdonyń otany Japonııa­­nyń ókili Soýýshı Hashımoto­ny ábden ábigerge túsirdi. Tórt mınýt boıy japon sportshysy­nan ba­sym bolǵan Mırodjan Azııa oıyndarynyń altyn meda­lin moınyna taqty. Jýrnalıs­ter­ge bergen suhbatynda óziniń myq­­ty ekenin, áli talaı jarys­ta chempıon bolatynyn aıtqan ózbek balýany shynynda da teń­dessiz ekenin sary qurlyqqa taǵy bir márte dáleldedi. Qazaq qu­ramasy altyn medal ańsap júrgende, Mırodjan Iýldashev О́zbekstan quramasyna tórtin­shi altyn medaldi alyp berdi. Aıtpaqshy, 2022 jyly Azııa chempıonatynyń fınalynda dál osy Mırodjan bizdiń júldesiz qalǵan Danııar Shamshaevtan jeńilgen edi.

Júgirgen jetpes, buıyrǵan ketpes

Jarystyń ekinshi kúninde Nıkıta Chırıýkın qola medal jeńip alǵany qyzyq boldy. Ol tapanshamen 10 metrge nysana kózdeýden úzdikter qatary­na endi. Aldymen, Nıkıta 10 metrge pnevmatıkalyq tapanshamen nysana kózdeýden fınalda synǵa tústi. Ol irikteý kezeńinde jetinshi oryn alyp, fınaldan syrt qalǵan edi. Alaıda aqtyq synǵa ótken qy­taılyq sportshylardyń birin erejeni buzǵany úshin jarys­tan shettetip, bos qalǵan oryn­ǵa Nıkıtaǵa jol ashyldy. Nátı­jesinde, fınalda Chırıýkın ­jal­py esepte 26 upaı jınap, qola júlde jeńip aldy.

– Az ǵana kúsh jetpedi. Júı­ke de kerek. Munymen toqta­maı, ­ári qaraı damý qajet. Fızı­ka­lyq áleýetimdi de, psıholo­gııany de jetildirý kerek. Sodan soń budan da joǵary nátıje­ bolady dep úmittenemin, – dedi N.Chırıýkın.

Nysana kózdeýden erler ara­synda Islam Satpaev – 6, Assadbek Nazırkýlev – 9, Bah­tııar Ibraev 11-orynnan kórindi.

Ala-qula oıyn

Bul kúni boksshy qyzymyz Natalıa Bogdanova (66 kg) saý­dııa­lyq qarsylasyn mer­zi­mi­nen buryn jeńdi. Jaǵa­jaı vo­leı­bolynyń shırek fı­na­lyn­­da Qazaqstan 1 (Bogatý/Iаkov­lev) komandasy Qazaqstan ­2 (Al­dash&­Gýrın) komandasy­nan 2:1 esebimen basym tústi.

Al erler arasynda maýntınbaık velojarysynda Denıs Sergıenko men Egor Karasev besinshi jáne altynshy orynnan kórindi.

Erler arasynda taekvondodan 58 kılo salmaqta synǵa túsken Eldos Ysqaqtyń tym bolmaǵanda qola medal alýǵa múmkindigi bar edi. Ol 1/16 fınalda Shyǵys Tımor, 1/8 fınalda Lıvan sportshylarynan basym túskenimen, 1/4 fınalda oılamaǵan jerden aýǵanstandyq Mohsen Rezaeıge 0:2 esebimen jol berip qoıdy. Osylaısha, M.Rezaeı Aýǵanstanǵa ázirge jal­ǵyz qola medaldi alyp berdi.

Al Botagóz Qapanovanyń (49 kg) shamasy 1/4 fınalǵa de­ıin ǵana jetti. Ol Mobına Ne­matzadehten (Iran) 0:2 esebimen utyldy.

Akademııalyq eskek esýden Vladıslav Iаkovlev te, áıelder quramasy da 5-oryn aldy.

Tennısten juptasyp óner kórsetýde Beıbit Juqaev/De­nıs Evseev – Hazava Shındjı/Ýesýgı Katoǵa (Japonııa) 0:2 ese­bimen jeńilip qalsa, Jibek Qu­lambaeva/Gozal Aınıt­dı­nova Qatar tennısshilerinen ­2:0 esebimen basym tústi.

Jekeleı synda Denıs Ev­seev shyǵystımorlyq tennısshige esh múmkindik bermese (2:0), Grıgorıı Lomakın/Dmıtrıı Popko juby ońtústikkoreıa­lyq tennısshilerge 1:2 esebimen ese jiberdi. Jarystyń ekinshi aınalymyna shyqqan Arýjan Saǵyndyqova úndistandyq árip­tesine shamasy kelmedi (0:2).

Sý dobynan Qazaqstan áıel­der quramasy alǵashqy oıynda Sıngapýrden 9:5 esebimen basym tústi.

Regbıden Qazaqstan áıelder quramasy Úndistan quramasyn 24:7 esebimen oısyrata jeńdi.

Al kógaldaǵy hokkeıden Qa­zaqstan quramasy (áıelder) Taılandtan 0:4 esebimen jeńildi.

Shahmattan 4-raýndtyń oıyn­­dary aıaqtaldy. Jekeleı synda Bıbisara Asaýbaeva ındo­­nezııalyq Medına Varda Aýlıa­dan basym tússe, Jan­saıa Áb­dimálik taǵy bir Indo­nezııadan kelgen Irıne Harısma Sýkandardy jeńdi.

Ázirshe Bıbisara Asaýbaeva 3 jeńis, 1 teń nátıjemen 3-orynda, Jansaıa Ábdimálik 3 je­ńispen 5-orynda tur. Al erler básekesinde Rınat Jumabaev Fılıppın shahmatshysy Paýlo Bersamınaǵa, al Qazybek Nó­gerbek alań ıesi Iý Veıge ese jiberdi. Qazybek Nógerbek 2,5 upaımen 8-orynǵa jaıǵassa, Rınat Jumabaev 2 upaımen ázir­ge 18-orynǵa turaqtady.

Semserlesýden Nazarbaı Sat­tarhan irikteýden óte almasa, Artem Sarkısıan shırek fı­nalda kýveıttik sportshyǵa 10:15 esebimen jeńildi.

Keshki jarys sessııasy boks­shymyz Sáken Bıbosynovtyń jeńisimen aıaqtaldy. Ol moń­ǵolııalyq áriptesinen 5:0 ese­bi­men basym tústi.