Brazılııa uzaqmerzimdi ekonomıkalyq qajettiligin qamtamasyz etý maqsatynda Ortalyq Azııa memleketterimen belsendi qarym-qatynasyn damytyp keledi. Ásirese osy aımaqtaǵy baılanystarda Qazaqstannyń orny bólek. Bıyl Brazılııa men memleketimizdiń dostyq qarym-qatynasyna 30 jyl tolyp otyr. Osyǵan oraı Jetisý oblysynyń basshylyǵy men Brazılııa Federatıvtik Respýblıkasy senatorlary kezdesti.
Búginde Brazılııanyń Qazaqstanmen baılanystary qarqyndy damý ústinde. Ekijaqty baılanystar tek mıneraldyq resýrstardy ǵana emes, sondaı-aq jol qurylys materıaldarynyń tasymaly, munaı men gaz óndirisine qajetti hımıkattardyń tasymaly, «NEHI» saqtandyrý uıymynyń qatysýymen qarjylandyrý sııaqty jańa is-sharalarmen tolyǵyp keledi. Osy rette kezdesýge Senat tóraǵasynyń III orynbasary, parlamentarlyq Qazaqstan-Brazılııa tobynyń tóraǵasy Chıko Rodrıges, senator Anjelo Martınz, onyń zaıyby Eleýsa Margarıda Martınz jáne Senat keńsesiniń qyzmetkeri Jose Rıkardo qatysty. Qazaqstan tarapynan Jetisý oblysy ákiminiń orynbasary Áset Qanaǵatov, kásipkerlik jáne ındýstrıaldy-ınnovasııalyq damý basqarmasynyń basshysy Baqytnur Baqytuly, «Zhetysu Invest LTD» JShS dırektory Ánýarbek Tileýlesov jáne «Zhetysu Invest LTD» JShS ǵylymı-zertteý jáne taldaý bóliminiń bas mamany, aýdarmashy Elena Geıger boldy.
Resmı deńgeıdegi eki memlekettiń qalyptasýyna yqpal etken oqıǵalardyń biri – «Qazaqstan Respýblıkasy men Brazılııa arasyndaǵy dostyq, áriptestik jáne yntymaqtastyq týraly birikken málimdeme». Osy málimdemeniń nátıjesinde memleketterdiń qarym-qatynasy strategııalyq áriptestik deńgeıge kóterilgeni málim.
Kezdesý barysynda Áset Qanaǵatov Qazaqstan men Brazılııa elderi arasyndaǵy ekijaqty dostyq qarym-qatynastyń nátıjesinde kóptegen joba iske asyp jatqandyǵyn atap ótti. Sonymen qatar 2022 jyly eki el arasyndaǵy taýar aınalym eki ese ósip, 364,4 mıllıon dollardy quraǵan.
«Qytaı men Ońtústik-shyǵys Azııadan TMD elderine jáne Eýropaǵa shyǵatyn mańyzdy baǵyttardyń qıylysynda geografııalyq jaǵynan yńǵaıly ornalasqan «Qorǵas – Shyǵys qaqpasy» erkin ekonomıkalyq aımaǵy qazirgi tańda mańyzdy ınvestısııanyń kózine aınalýda. Onyń aýmaǵynda 2030 jyldyń sońyna deıin jalpy quny 570 mıllıard teńgeni quraıtyn 30 joba júzege asyrý josparlanyp otyr. Nátıjesinde, Qytaı Halyq Respýblıkasymen birigip 2 myńnan astam jumys orny qurylady. Shamamen 330 mıllıard teńge ınvestısııa tarta otyryp, kólemi 1 000 gektar bolatyn «Qazaqstan – Qytaı» halyqaralyq ındýstrıaldy qalasy» ındýstrıaldy tehnoparkiniń qurylysy boıynsha birlesken joba bolmaq. Eń bastysy, árbir istiń nátıjesi halyq úshin», dep atap ótti jıynda oblys ákiminiń orynbasary.
Jalpy, oblysta aýyl sharýashylyǵy, kólik-logıstıka, týrızm, balamaly energetıka jáne ónerkásip sııaqty strategııalyq salalarǵa jańa ınvestorlardy tartý boıynsha júıeli jumystar júrgizilip keledi.
Mártebeli meıman Chıko Rodrıgers qazaq halqynyń qonaqjaılylyǵy men keń peıiline alǵys aıta otyryp, bolashaqta da dostyq qarym-qatynasty arttyryp, yntymaqtasyp birshama tyń ári jańa jobalardy iske asyratyndyqtaryn jetkizdi.
«Qos eldiń dostyq qarym-qatynasta eńbek etip kele jatqanyna bıyl – 30 jyl. Bul az ýaqyt emes. Biraq bizdiń dostyq, tatýlyq, yntymaq budan da kóp jylǵa uzarýy kerek. Bizdiń sapardyń maqsaty – eki eldi jaqyndastyra otyryp, elge qajetti jańa joba daıyndap, nátıjeli jumys isteý. Mıneraldy resýrstar, jańartylǵan energııa kózderi aıasynda tyń jobalar ázirlep, sol boıynsha el ekonomıkasyn kóterýge biz barynsha atsalysamyz», dedi Chıko Rodrıgers.
Qos tarap ókilderi tyń isterdi ázirleýge yntymaqtastyq múmkindikteriniń mol ekenin aıtyp, bolashaqta túrli jobany birlese atqaratyndyqtaryn jetkizdi.
Jetisý oblysy