Qaraǵandy medısına ýnıversıteti klınıkasynyń bas hırýrgi, hırýrgııalyq aýrýlar kafedrasynyń professory Nurqası Abatov respýblıkalyq «Eńbek joly» baıqaýynan jeńimpaz atanyp, mereıi tasydy. Bilikti hırýrg baıqaýdyń «Jumys isteıtin jastardyń úzdik tálimgeri» atalymynda top jardy.
Nurqası Tólepbergenuly – óziniń eńbek jolynda 6 myńnan asa pasıentke operasııa jasaǵan jan. Medısınadaǵy myna bir jetistigi aq jeleńdilerdiń arasynda asa qurmetpen atalady: elimizde alǵash ret búırekke, sondaı-aq mehanıkalyq sary aýrý kezinde uıqy bezi men ót joldaryna laparoskopııalyq rekonstrýktıvti operasııa jasaǵany. Munymen qosa, 1996 jyly Qaraǵandyda alǵashqylardyń biri bolyp qursaq qýysy músheleriniń ártúrli aýrýyn jedel emdeýdiń endovıdeohırýrgııalyq ádisterin tájirıbe júzinde iske asyrǵan maman.
Odan bólek, Densaýlyq saqtaý mınıstrliginiń klınıkalyq protokoldaryn, oqytýdyń jańa ádisterin ázirleýge únemi qatysady. Kásibı bilimin jetildiremin degen dárigerler men hırýrgterge arnap 30-ǵa jýyq beınefılm jasaǵanyn, 100-den asa ǵylymı jarııalanymdary baryn da qosa ketkenimiz jón.
Kópjyldyq eńbegi bar bilikti hırýrgtiń bilgenimen bólisýin azamattyq der edik. Professor qosymsha stýdentter men rezıdent dárigerlerge dáris oqıdy, sheberlik sabaǵyn ótkizedi, bilgenin úıretedi. Sondaı shákirtteriniń biri – Qaraǵandy medısına ýnıversıteti klınıkasy hırýrgııa bóliminiń meńgerýshisi Rýslan Badyrov.
– Nurqası Tólepbergenulynyń alǵashqy shákirtteriniń biri ekendigimmen maqtanamyn. Professordyń jetekshiligimen magıstratýra men doktorantýrany bitirdim. Tálimgerligimen tórt doktorlyq jáne segiz magıstrlik jumys qorǵadym. Bilikti hırýrg – rezıdent dárigerlerdiń tálimgeri. О́z oqýshylaryn klınıkalyq úderiske bar ynta-yqylasymen jumyldyrady. Talaı jas hırýrgterdiń qasynda turyp, operasııa jasatty. Únemi aqylyn aıtady. О́ziniń tájirıbesimen bólisip, janashyrlyq tanytyp júredi. Kóptegen izinen ergen hırýrgterge jol kórsetken jomart kisi, deıdi shákirti Rýslan.
Nurqası Tólepbergenuly medýnıversıtetti támamdaǵan soń eńbek jolyn burynǵy Torǵaı oblysynyń Amangeldi aýdanynda dáriger-hırýrg bolyp bastaıdy. Keıin Qaraǵandyǵa qonys aýdaryp, qyzmetin oblystyq klınıkalyq aýrýhanada jalǵastyrady. Alǵash 1996 jyly medısına ǵylymdarynyń kandıdaty ǵylymı dárejesin alady. Odan soń oblystyq densaýlyq saqtaý basqarmasynyń bas hırýrgi bolyp qyzmet etedi. Bilikti dárigerdiń basshylyǵymen oblysta alǵash ret ambýlatorııalyq hırýrgııa jáne travmotologııa ortalyǵy ashylǵanyn atap aıtsaq, esh artyǵy joq. Hırýrgııalyq otalardyń synyptamasy, emdeý mekemeleri tıimdiliginiń ekonomıkalyq esepteri, medısına mekemeleriniń emdeý qyzmeti boıynsha tólemi ázirlendi. Osyndaı izgilikti istiń bárine, jalpy Qaraǵandydaǵy densaýlyq saqtaý salasyn jetildirýge Nurqası Abatovtyń sińirgen eńbegi mol.
Professor Nurqası Tólepbergenulynyń eńbegi eskerýsiz emes. Búgin «Eńbek joly» baıqaýynda baq juldyzy jansa, buǵan deıin «Densaýlyq saqtaý isiniń úzdigi» tósbelgisimen marapattalǵan. Jerlesimiz – «Qazaqstannyń 100 jańa esimi» respýblıkalyq baıqaýynyń da jeńimpazy. 2010 jyly «Úzdik hırýrg» atalymy boıynsha Qaraǵandy oblysy ákimi syılyǵynyń laýreaty.
Qaraǵandy oblysy