Ǵanı Beısembaev chellendj basynda óziniń aıaýly ustazdary týraly estelikterin bólisti.
«Eń aldymen Hákim Abaıdyń «Adamzattyń bárin súı baýyrym dep» qaǵıdasyn boıyma ábden sińirgen, ómirlik ustazdarym - ata-anama alǵys aıtqym keledi. Kezinde biz bir qabatty, saban kirpishten qalanǵan, shaǵyn mektepte tálim aldyq. Sol aıadaı ǵana bilim uıasyn oqýshyǵa degen mahabbatymen záýlim ári jaryq etken ustazdarymdy árdaıym qurmetpen eske alamyn. Ásirese alǵash «Álippemen» tanystyryp, saýatymyzdy ashqan Qyzylbaeva Dámesh apaıyma myń taǵzym etemin. Búginde ol kisi toqsannyń tórine shyqqan ardaqty áje. Dámesh apaıdan keıin 4-7 synypta bizdi óz alaqanyna alǵan Syzdyqova Kúltaı apaıymyz da jadymyzda. Áýelde qatal kóringenmen, qamqorshy bolǵan ustazymyzdyń jaqsylyqtaryn bala kóńil qaıtip umytsyn?! Odan keıingi qyzyq ta eń qıyn kezeń, bozbala men boıjetken sátimizde tálimi men tárbıesin kórgen synyp jetekshimiz Seıilova Ultaı apaıymyzdy umytý tipti de múmkin emes. Ultaı apaıdyń sol kezdegi beınesi «Qyz Jibek» fılmindegi Jibekke uqsaıtyn», dep eske aldy mınıstr.
Sondaı-aq pedagog retinde qalyptasý jolynda tálimgerlik etken Dálelhan Mýsın, Raýshan Býkaeva, Antonına Bondareva, Qanıpa Bitibaeva, Shámshá Berkimbaeva ustazdary bul ómirden ozsa da, olardyń esimi máńgi jadynda ekenin atap ótti.
«Jas urpaqty tárbıeleý jolynda tynymsyz eńbektenip, aǵartýshylyq qyzmetti abyroımen atqaryp júrgen jáne zeınet demalysyndaǵy pedagogter qaýymyna shynaıy rızashylyǵymdy bildire otyra, árqaısylaryńyzdyń otbasylaryńyzǵa amandyq, denderińizge saýlyq tileımin! Shákirtterińizdiń qurmetine bólene berińizder, mereılerińiz ústem bolsyn!», dep jazdy mınıstr óziniń Facebook paraqshasynda.
Sondaı-aq kásibı merekege oraı, barsha Qazaqstan azamattaryna jáne Nurtóre Júsip, Askhat Aimagambetov, Tamara Dúısenova, Aida Balayeva, Sayasat Nurbek, Giniyat Azhar áriptesterine «Ustazym meniń, ustazym!» atty chellendj joldady.
«Aıaýly ustazdaryńyz jaıly jyly lebizderińizdi bildirip, qyzyqty estelikterińizben bólisýge shaqyramyn», dedi Ǵ.Beısembaev.