Telegramda áldekimge daýys ber degen syńaıda habarlamalar kele bastady. Ol habarlama sizdiń jaqyn tanysyńyzdan da kelýi múmkin. Ony siz dosyńyzdyń jaı ǵana ótinishi retinde qabyldap, siltemege ótseńiz alaıaqtyń arbaýyna tústińiz degen sóz. Mundaı jaǵdaıda ne isteý kerek, kıberalaıaqtardan qalaı qorǵanýǵa bolady degen suraqtardyń jaýabyn Big Data and Analytics qaýymdastyǵynyń prezıdenti, Marketo kompanııasynyń bas dırektory Sergeı Ahmetovten surap kórdik.
Áleýmettik jeliniń paıdasymen birge kóleńkeli jaqtary da beleń alyp, alaıaqtardyń qurbany bolǵandardy jıi kezdestirip júrmiz. Qas pen kózdiń arasynda aram oıyn júzege asyratyndardyń qıturqy áreketinen óz ortamyzdaǵylar da zardap shegip júr. Telegramǵa kelgen siltemeni ashqan tanysymyz alaıaqtardyń arbaýyna túsip, yńǵaısyz jaǵdaıda qalǵan jaıy bar. Kıberalaıaq onyń telefonyndaǵy barlyq abonentke qol jetkizip, zardap shegýshi azamattyń atynan top quryp, siltemeler jibere bastady. Siltemeni ashqan adamda jaǵdaı qaıtalanyp, alaıaqtyń isi jalǵasa beredi. Sergeı Ahmetovtiń aıtýynsha, hakerler bul áreketti eki sebeppen jasaýy múmkin. Biri adamnyń bank kartasyndaǵy shotyna qol jetkizse, endi biri úshin bul erikkenniń ermegi eken.
«Mundaı siltemeler maǵan da keledi. Bul jaǵdaıda siltemeni ashpas buryn, ony kóshirip alyp, arnaıy tekseretin saıttarǵa salyp, tekserip alǵan jón. О́zim siltemeni ashpas buryn vms.drweb.ru saıty arqyly tekserip otyramyn. Sondaı-aq qaýipti siltemelerdi @DrWebBot Telegram-boty arqyly da anyqtaýǵa bolady. Siltemeni ashqan jaǵdaıda alaıaqtar sizdiń telefonyńyzdaǵy málimetterdi kóshirip alyp, óz oıyn júzege asyrýdan taıynbaıdy», dedi S.Ahmetov.
Budan soń ol alaıaqtyń bul áreketin qalaı toqtatýǵa bolatynyn aıtty. Ol úshin Telegramnyń ishindegi Parametrler (Nastroıkı) bólimine kirip, Qurylǵy (Ýstroıstvo) degen qatardy tańdaısyz. Sol jerde sizdiń Telegramyńyzǵa kirip otyrǵan ekinshi adam jaıynda derekti kórýge bolady. Sol qurylǵynyń ústinen basyp, óshirip tastaý kerek.
Sondaı-aq Sergeı Ahmetov áleýmettik jelidegi paraqshalarǵa qıyn qupııa sóz qoıýdy keńes berdi. Barlyq áleýjelide qupııa sóz birdeı bolǵan jaǵdaıda alaıaqtar birden barlyq paraqshańyzdy buzýy múmkin. Qupııa sózderdi saqtaý úshin Kpass qoldanbasyn qoldanǵan jón.
«Kópshiligi bógde siltemelerdi ashyp, ońaı qupııa sóz qoıǵandyqtan zardap shegip jatady. Negizinde bul árekettersiz alaıaqtar ózdiginen shabýyl jasaı almaıdy», dedi ol.
Bir qaraǵanda munyń barlyǵy qarapaıym dúnıe sııaqty bolyp kóringenimen, syn saǵatta kez kelgen adam abdyrap qalýy múmkin. Maman keńesi qaperińizde júrsin.