Eskeldidegi oqıǵa eldiń esinen shyǵa qoıǵan joq. Tolassyz jaýynnyń saldarynan sel basyp, aýyldaǵy turǵyndar baspanasynan aıyrylyp qalǵan edi. Oblys ákimdigi qarapaıym halyqty jańa turǵyn úımen qamtamasyz etýge ýáde bergen. Mine, endi turǵyndar sol shańyraqqa qonystana bastady.
Apat aıtyp kelmeıtini barshaǵa aıan. Eki kúnge sozylǵan jaýyn-shashyn taý eteginde eldi mekenderdi ábigerge saldy. Eń ókinishtisi, aýyldaǵy aǵaıyn jyly úıinen aıyrylyp qalǵan edi. Sóıtip, Eskeldi aýdanyna qarasty Abaı, Eshkiólmes, Qarabulaq aýyldaryndaǵy qatty nóser saldarynan aýla-aýmaqtary men turǵyn úılerdi sý basýdan kelgen shyǵyndy óteýge saraptama júrgizilgen. Sonyń nátıjesinde, ári smetalyq esepterdiń qorytyndysyna saı bıýdjetten 403,5 mln teńge bólindi. О́ńir ákimi baspasóz qyzmetiniń málimetinshe, 22 úı satyp alýǵa – 216,8 mln teńge, 83 úıge aǵymdaǵy jáne kúrdeli jóndeý júrgizýge 186,7 mln teńge qarastyrylǵan.
Eskeldi aýdany ákimdiginiń derekterine qaraǵanda, jobalyq-saraptamalyq jáne smetalyq uıymmen birlesip sý basý saldarynan keltirilgen zalaldy baǵalaý jumystary júrgizilgen. Jalpy aýdannyń aýyldyq eldi mekenderinde – 105 úı, sonyń ishinde Abaı aýylynda – 11, Eshkiólmes aýylynda – 28, Qarabulaq aýylynda 66 úı zardap shekkeni anyqtaldy. Zardap shekken úılerdiń 22-si buzylady, 83-i aǵymdaǵy jáne kúrdeli jóndeýden ótedi.
«Búgingi tańda aýdan ákimdigi 7 úı satyp aldy, úıleri búlingen turǵyndar osy satyp alynǵan úılerge qonystanyp jatyr, qalǵan 15 úıdi satyp alý rásimderi júrgizilý ústinde. Sondaı-aq qalpyna keltirý qajet dep tapqan 83 úı ıelerine tólem jasalýda. 21 qyrkúıektegi málimetke sáıkes, qalpyna keltirý jumystaryn júrgizý úshin 76 úıdiń ıelerine 173,1 mln teńge tólendi. Bul baǵyttaǵy jumystar áli de jalǵasyp jatyr», dedi aýdan ákimdiginiń qyzmetkerleri.
Sonymen qatar qyrkúıek aıynyń sońyna deıin jalpy uzyndyǵy 12,7 km bolatyn 7 kóshege jalpy somasy 688,1 mln teńgege ortasha jóndeý jumystaryn aıaqtaý josparlanǵan. Búginde Eshkiólmes, Qarabulaq, Baqtybaı aýyldaryndaǵy 4 kóshede jumys aıaqtalyp, Eshkiólmes, Qaratal, Qarabulaq aýyldaryndaǵy 3 kóshede jumys jalǵasyp jatyr.
Sondaı-aq jalpy somasy 8,7 mln teńgege Abaı aýylyndaǵy Baqtybaı kóshesi men Eshkiólmes aýylyndaǵy M.Tynyshbaev kóshesine jaryq ornatylýda. Kóshelerdiń jalpy uzyndyǵy – 3 shaqyrym.
Qazir turǵyndardyń kóńili ornyna túsken. Qytymyr qys ta jaqyndap keledi, selde qalǵandardyń ýaıymy osy edi. Ákimdik tarapy bul jaıt áli de baqylaýda bolatynyn aıtyp otyr.
Jetisý oblysy